被譽為平民股神、在《信報》撰寫〈投資者日記〉專欄超過30年嘅曹仁超（圖），打算今年底正式封筆兼離開老東家，之後會用多啲時間搞慈善工作。唔知係咪近期大老闆小小超再度榮升老竇飛咗去加拿大，曹Sir同八方講仲未正式遞信唔撈，但應該會係一、兩個月後嘅事。
做善事 專注A股
曹Sir噚日講，封筆後唔會喺其他地方爬格仔，離開亦唔係同其他人有衝突，只係覺得差唔多要退落嚟，想用多啲時間做慈善工作，亦可以集中精力研究內地A股。
近排股市唔好，曹Sir自嘲呢排輸咗幾個Mil（幾百萬元），叫我哋唔好叫佢做專家，事關專家只係識事後孔明。真名叫志明的曹Sir又自爆，「長線投資必死，買股票三、四日就要計一次數，就好似齣戲（《志明與春嬌》）入面，春嬌識咗志明四、五日後，就決定受媾定係散band喎！」
06年《信報》賣盤畀小小超，曹Sir亦順手賣埋股份，不過當年盛傳小小超要曹Sir簽兩年死約，繼續寫專欄。約滿後，09年日記變成周記，其間屢傳佢同前老細不和，打算蟬過別枝。