鬍鬚曾噚日喺網誌自爆，呢個月頭佢趁去佛山公幹，順道參觀當地嘅黃飛鴻紀念館同葉問堂。鬍鬚曾喺美國讀書時學洪拳，黃飛鴻係佢師公嘅師公，佢喺紀念館睇到唔少史料，發現黃飛鴻電影裏面儆惡懲奸嘅橋段，都係有根據，佢仲睇咗黃飛鴻同佢第四個太太莫桂蘭嘅相；有人話電影裏面十三姨個角色，就係以莫桂蘭為藍本，黃飛鴻跌打館就係莫桂蘭移居香港後開嘅。
鬍鬚曾又去咗祖廟群內嘅葉問堂，堂內有唔少珍貴展品，例如葉問嘅香港身份證、回港證等，仲有葉問同弟子李小龍一齊影嘅相。鬍鬚曾十足宣傳易上身咁，話無論你係葉問迷、李小龍迷或者係詠春迷，都可以喺嗰度搵到想睇嘅嘢喎。