21歲的Angelababy（楊穎）近兩年攻日、拍電影、拍廣告，走勢凌厲。Baby的告別寫真集將於後天推出，未出街，中港台日定單已超過3萬本。Baby今次賣高貴而不走色情，但就很辛苦，在關島潛水、被太陽乾煎中暑，在樹林取景時，又給螳螂和青蛙嚇親。
每年一度的書展將於後天開鑼，一眾o靚模寫真以性感為賣點，肉體橫陳，大出法寶大賣噴血誘惑。o靚模始祖Angelababy今年於書展推出第三本寫真集《Paradise》，將會是最後一擊的封書之作，寫真相同樣有性感泳衣照，但主力sell高貴、藝術形象，由攝影名師夏永康（WingShya）拍攝。
兩遇驚險
Baby形容第三本寫真集是超越了自己，在海中出水芙蓉，她說：「最初想過放棄，驚險一係因為第一日已經中暑，開始嘔又頭暈，第二日正式拍攝時又要落水，之後每日又要浸入海、泳池，又要浸入水中6小時拍攝，仲要擘大眼潛入水底，過程好辛苦。」
Baby續說：「我最怕蛇蟲鼠蟻，驚險二係拍攝時去到森林見到草地有蛇皮，又有螳螂同青蛙，嚇到我差啲喊，stylistSean好似阿凡達抱我坐喺樹枝上，一坐上去就有好多黑色嘅蝴蝶飛出嚟，嚇到我一邊擺甫士，一邊大叫。」
想出自傳
在微博不時有感性文字，問Baby寫真集後，可會考慮寫書做才女？她說：「有諗過出自傳，不過經理人Kim覺得我只得21歲太早出自傳。」下半年Baby會集中電影工作，她說：「已接咗三部戲，好欣賞張曼玉嘅演技，將來希望好似佢成為影后。」
據Baby的經理人Kim透露，Baby的《Paradise》定單已超過3萬本，出版商正商討加印。寫真相更會於下月中在香港及日本舉行慈善相展。
採訪：JessicaNgan
攝影：ChanChiLam
化妝：Candy
髮型：CarrofPopSalon
服裝提供：REDValentino
