英超伯明翰昨午在香港大球場進行表演賽，無懼逾攝氏38度的熱浪，在比賽末段「㩒掣」連入兩球，由今季以600萬鎊（約7,140萬港元）轉會費加盟的塞爾維亞中鋒施積，二傳加利奧干拿建功，以3:2反勝港聯，在亞洲之旅首站響頭炮；足總今次主辦伯明翰賽事獲約150萬元盈利，或可紓解財困。
上屆英超第9名的伯明翰首度訪港，縱使沒有大牌球星，兼受高溫影響，還有電視直播，但門票便宜，結果吸引13,626名球迷入場，門票收入達1,467,020元；兩隊亦落力演出，以5個入球回饋球迷支持。
客軍先由中堅史葛丹恩頭槌開紀錄，但港聯憑辛祖及安基斯妙射，完半場前反先2:1；伯明翰易邊後作出6個球員調動，在74分鐘由格力加特拿頭槌扳平。而今夏從西甲華倫西亞轉會伯明翰的施積於66分鐘登場，他在完場前1分鐘於禁區遠柱位，巧妙地第一時間二傳予後上的加利奧干拿撞射成3:2勝出。
麥帥：施積有作用
伯明翰領隊麥利殊賽後稱，現場極之濕熱，對球員來說非常辛苦；但球員踢來落力，幾名新兵亦做足本份，其中施積因剛踢罷世界盃，休息不多，狀態與其他球員比較是有點距離，「但他後備落場有不俗表現，證明其身材及傳球能力，相信季內在前線可起到作用。」麥帥對港聯演出均留下良好印象，還點名讚鋒將羅志焜表現出色。伯軍今晨起程到北京，備戰周三對FC北京的第2站賽事。
曾sir猛讚本地薑
港聯教練曾偉忠賽後表示，球隊基本上做到賽前部署，球員踢來很有信心，亦未有全軍退守，可惜比賽末段專注力不足致敗：「除麥利殊稱讚的羅志焜外，其實好幾位本地球員亦有上佳發揮，像朱兆基全場努力參與攻守，我好耐未見過他有咁好表現；翟廷峰同白榮澤等新秀，踢來亦不怯場。」
被問到港隊稍後會否重召這些過去幾年像被遺棄的「土炮」，以應付未來國際賽時，曾sir表示將依球員開季後表現作選人準則，但在球會當後備則不是考慮之列；足總將於周內公佈出戰11月亞運的港隊集訓隊名單，並於下周一進行首課操練。
本報訊
花絮：「5.19」唔夠砌
噚日頭場由「5.19」對伯明翰邀請隊，其中前者有前港隊領隊余錦基入場撐場之餘，仲搵咗李健和同歐偉倫等退役冇耐嘅球星助陣，可惜最終以1:2輸咗俾伯明翰邀請隊。
花絮：vuvuzela世盃後遺症
世界盃完咗冇幾耐，但大球場都搵到唔少世盃「後遺症」，好似喺今屆世盃出晒名嘅vuvuzela魔鬼喇叭，噚日都有唔少球迷帶入場吹餐飽。
花絮：曼聯迷撐賓科士打
有兩位讀中學嘅堂姐妹（圖）第1次現場睇波，主要係想見龍門賓科士打；佢哋原來係曼聯球迷，雖然賓科士打由曼聯過檔伯明翰，但話晒踢過曼聯，而且學生票才40蚊，能喺香港見到佢真人，都算了咗心願。
港聯vs伯明翰之最
最賺錢--盈利150萬
足總主辦伯明翰訪港獲240萬港元收入，加上伯明翰班主楊家誠（中）昨額外捐贈75萬港元，在扣除場租等開支，足總可獲150萬港元盈利。
最爛口--羅渣莊臣
踢足全場，表現不差，原來非常爛口，多番在場內大聲用粗口提隊友場。
最好火--巴利費格遜
以搶截出名夠狠的巴利費格遜（右），上半場幾次中場搶波保持水準，結果被球證判罰，之後㷫到鬧番球證。
最cool--史葛丹恩
在首場熱身賽即入波的史葛丹恩（藍衫），但入波後完全冇笑容。
最缺態--基夫法希爾
踢了66分鐘，全場建樹不多，看來狀態有待提升。
最舒服--列治維
上半場在西看台陰頂位，大部份時間是行行企企，應該踢得最舒服。