樂壇教父戴思聰昨日因為急性冠心病引起併發症病逝，終年69歲。戴思聰生前曾一手捧紅不少天王天后如黎明及王菲等，他的兩名女兒戴蘊慧和戴辛尉自幼受父親薰陶熱愛唱歌，並先後加入樂壇，可惜星運平平。不過戴思聰一直努力為女兒牽線，於兩個月仍四出奔走，替細女戴辛尉斟出碟，奈何最終未能圓夢。
戴思聰昨日因為急性冠心病發引起併發症逝世，據悉其家屬及愛徒將會為他舉行追思會。戴思聰生前桃李滿門，過往曾捧紅過不少歌手，偏偏他的兩位女兒戴蘊慧及戴辛尉雖曾出過唱片，不過一直星運平平。早於兩三個月前，戴思聰仍然為細女戴辛尉的事業奔走，希望再為女兒出碟。
新娛國際老闆丘亞葵昨日接受本報電話訪問時透露，之前曾與戴思聰見面洽談合作，在場更有他的第一位學生張明敏，他說：「佢話手頭上有幾個歌手想合作，其中一個係佢個女戴辛尉，戴辛尉之後都有send咗幾首歌畀我聽，佢唱得好好。其實戴思聰喺音樂上仲有好多嘢想做，好似想幫幾個男仔出碟，不過當時傾嘅嘢都好初步。」
戴辛尉不想受父蔭
戴辛尉於過往的訪問中提及到父親想她兩姊妹於樂壇有一番成就，她說：「父親想我哋成功，但家姐喺黃金時期退出呢個圈，剩得我可以完成父親心願。」不過戴辛尉加入樂壇多年，星運麻麻，沒有其父所捧的歌手般大紅大紫，原來她一直都不想受到父蔭，她表示：「有個咁出名嘅父親，我要紅，一啲都唔難，不過佢幫我，我會好反感。我識唱又識作，靠自己，遲早有回報。」
戴辛尉又認為父親的名氣令她背負更大的壓力，她說：「父親咁叻，啲人認為個女一定會掂。現實話畀你知，冇嘢係必然嘅。有時諗，如果戴思聰唔係我父親，我壓力冇咁大，成績可能會好啲。」雖然曾經得到劉德華、黎明及金牌經理人黃柏高的幫忙，戴辛尉仍未有機會大紅大紫，她續說：「我承認，我係戴思聰個女，無形中會有好多人幫我，但究竟係畀面我父親，定真係賞識我？」
兩吋短髮叛逆老父
當年戴辛尉因為剪了一個超短髮而令父親有怨言，她說：「我一向唔會逆父親意思，佢對我咁做有怨言，話長髮至似番個女仔，問我點解要剪成咁。」為人父母始終都疼愛自己的子女，戴辛尉98年於台灣舉行miniconcert時，戴思聰雖然抱病在身，醫生更吩咐他不可勞碌，但為了支持愛女，他於演唱會上現身，令台上的戴辛尉哭了，她說：「我喺台上望見佢，滿臉病容，好辛苦，我忍唔住，一路唱一路喊。」
教誨女兒承擔責任
戴辛尉早年接受內地報紙訪問時被問到父親「捧人必紅」，為何不叫父親捧紅她？她覺得父親太熟識她，沒有靈感，所以將她交給內地的公司。多年來外界都指戴思聰貪錢，與徒弟因為合約錢銀而有爭拗，更有人以「吸血鬼」形容他。對於父親被抹黑，戴辛尉強調其父的口碑不錯，否則不會有那麼多學生。早年戴思聰接受專訪時為自己解釋被指貪錢一事，他說：「話我貪錢搶錢？同我相處過嘅人就唔會認定我係咁，只不過佢哋佔世界上人口太少數，咁話我太委屈。」
提到有報道指戴蘊慧當年下嫁新加坡富商是父母所逼，戴思聰強調自己的責任是養到女兒18歲，他說：「我養到個女18歲，之後就由佢作主，我會話畀佢聽我嘅睇法係點，佢可以自己嘗試去跌去撞，唔聽我話嘅，係好嘅你就自己享受，唔好嘅就自己承受，犯錯就要自己承擔。」
戴蘊慧當年曾與黎明及吳國敬拍拖，91年嫁給新加坡華僑富商，並退出娛樂圈，97年離婚，至於戴辛尉於19歲時曾與謝霆鋒拍拖。
採訪：林妃
悼亡篇：樂壇失名師
圈中著名歌唱老師戴思聰，昨日因心臟病逝世，他生前為樂壇栽培了不少歌唱人才，在圈中地位崇高，各人對於這位歌唱界前輩的離去同樣深感惋惜。
劉家昌
深感可惜
「我唔知道戴思聰過咗身，我啱啱喺台灣返嚟。之前我喺內地留咗成個月工作，冇留意佢嘅新聞，真係可惜。」
陳奕迅
勸勿執着
「我同唔認識呢位老師，但希望佢家人節哀順變，身邊好多朋友嘅親朋過世，希望大家都要開心過每一天，唔好太執着。」
呂良偉
協辦喪事
「我跟戴思聰學咗十幾年唱歌，聽到呢個消息都好愕然！我即時打咗畀佢個女，睇吓有乜幫手，同埋治喪委員會嗰邊睇吓點樣幫手。」
鄺美雲
慰問師母
「我港姐卸任要表演去學唱歌，老師好遷就學生，佢寧願飯都唔食都會抽時間教我。家個心好唔舒服，我會慰問師母。」
梁珮瑚
學生爭氣
「老師生前對我同細佬都好好。老師好錫學生，佢呢排仲幫兩個新秀參賽者勤力練歌，希望佢哋爭氣攞到獎，以慰老師在天之靈。」
關楚耀
永留遺憾
「細個時爸爸同戴老師都有密切聯繫，細個都有去佢屋企，老師教我唱歌。媽咪噚晚話我知老師入咗院，未有機會去醫院，我好遺憾。」
