500Yen銀座自助Facial　人妻實試

現時五百元可買到甚麼？
Imean日圓not港元喎！
買5個飯糰、坐4次地鐵，還是一碗素烏冬？若我說，可以憑500Yen在東京高級地段銀座商場內做一次facial─有懷疑？講真，小記都係，所以就找來當地人妻model伴着小記實地視察及實試。

記者、攝影︰吳美美
鳴謝︰康泰旅行社

名牌地段平價Salon

位於銀座高級名牌的中心地段，三越松屋附近的Melsa商場，外表不起眼、內在不吸引，驟看絕對吸引不了一心到東京掃潮貨的港人，但暗地裏卻藏着好嘢，而且頗得一班自由行遊客的歡心，就是商場2樓有一間標榜500Yen（連稅後525Yen，約47港元）可做一次facial的selfservicebeautysalon「myQua」。小記出發前電郵預約，剛巧預約日子唯一懂普通話的服務員放假，店員知道我是香港人，就特登打電話來，問小記是否要更改日期，很貼心。未出發先抵讚!

自助1小時

去到，見開放式的salon，約有百多二百呎面積，負責招待的亦不是青春少艾。這次我和東京人妻model一齊去試，服務員先給我們看「菜單」，「500Yenfacial」有多款選擇，包括鼻部松脂溫熱面膜（去粉刺、收毛孔）、天然海洋凝膠療程（去角質、保濕）、超聲波洗淨療程（深層洗淨毛孔）等，每項療程約需一小時。話就話「自助」，但服務員都會傍住的，如預先準備面膜或為客人做面部按摩，像我們第一次幫襯的，若見到你有問題，即會過來幫手，當然，清潔面部、敷面膜等，都是靠自己吧！眼見一些熟客來到，她們都自己動手，在旁的服務員都只負責和她們傾偈。

■店子屬開放式設計，像平時化妝品counter的格局。

■除了清潔用品，還備有橡筋、專用潔面布，很細心。

試做過程

我們本只想試做鼻部松脂溫熱面膜，但職員說單一來做效果不夠明顯，之前先做天然海洋凝膠療程軟化皮膚較好。這個大家幫襯時請留意。

Step1　落妝

先自行落妝。產品都是用自家品牌，無論卸妝液及潔膚皂，服務員會提醒你要輕輕力。

Step2　軟化皮膚按摩

服務員先將天然凝膠化妝水（原價約$470）在面部按摩幾下，自己繼續按摩至滲透，再用毛巾抹走，重複五次就完成軟化皮膚的療程。

Step3　松脂溫熱面膜

松脂溫熱面膜含松脂、蜜蠟、仙人掌汁。服務員幫手把軟化的面膜塗在整個鼻位，等5分鐘，搣掉。搣面膜時model話都幾痛，但亦看到軟膠上都有不少污糟物。重複做兩次。

Step4　天然凝膠面膜

最後，敷上天然凝膠面膜（原價約$395）作保濕及收細毛孔就完成。

埋單：1,050Yen（約$94）

免費補妝

如果忘了帶自己的，這裏亦備有小量化妝品給大家作補妝。

Model試後感：「500Yen可以用佢哋幾千日圓嘅產品，好抵！而且做facial的工具屋企唔會有，畀500Yen同班friend一齊傾吓偈做吓facial都唔錯，又唔使執手尾。做完效果唔錯，毛孔污糟嘢少咗，塊面又幾水潤光澤。不過要有心理準備會sellproduct。」500Yenfacial當然是招徠法，不過見職員sell產品的「積極度」同香港差好遠，講多幾句你唔買都不至於黑面。而且產品售價由幾十港元起都有，試過好嘅，買都OK！