講到大亂鬥！近年除咗無雙系列，最能激起我打機熱血快感，就一定要數Capcom呢款以日本戰國為背景嘅《BASARA》系列，新作《戰國BASARA3》繼續亂世之戰，暫時公佈資料得知，仲有多名新武將加入，另加200種武器，給我殺吧！
記者：許福合
戰刻加速
玩得戰國BASARA，當然要認識各個武將特有嘅必殺技，今集除咗有新武將、新超必外，仲會引入新攻擊系統──戰刻加速；呢個系統可以將戰技加速，遊戲時留意武將頭像，會加入一個半圓形嘅戰刻加速計量表，當擊殺敵人或攻破敵人戰陣就會有所提升，儲滿會見到綠色火光，這時候就可在限定時間內使用，武將能力值會提升至極限，同時敵人動作會變慢，打起上嚟着數好多！
另外，戰刻加速與其他技能配合亦有增值效果，例如在戰刻加速狀態下，發動BASARA技，會強化成終極版BASARA，威力會強勁好多。
陣地戰
陣地戰係另一個新玩法！戰場上會出現陣地，當中會有一名守將，擊殺後就可取得陣地控制權，成功佔領陣地的好處，可以提升士兵攻擊力，並且有機會得到補給品等，同時陣地附近嘅敵軍士氣會大幅下降，玩家正好乘勝追擊，殺個屍橫遍野！
遇到敵軍將領，可以留意對方頭上星星數量，這是代表佔領陣地數量，越多就越強，所以佔領陣地亦可間接削弱敵方戰力。
雙人合作
如果你已經對一個人挑戰世界嘅玩法厭煩的話，新作分割畫面式嘅雙人玩法，話唔定更啱你！當然，你一定要預先搵個伴喇，進行遊戲時候，畫面會分割成上下兩部份，你與拍檔就會各自控制一名武將闖關，聯手除咗可以強化戰力外，更可以互相利用時差，使出戰刻加速，令到連招段數大幅提高，而且更重要係即使其中一人失手落敗，另一人都可以復活對方，聽落就好似玩緊網遊一樣。
Profile
主機：PS3
類型：動作
製作廠商：Capcom
發售日期：7月29日
遊戲人數：1-2人