倫敦雙雄車路士、阿仙奴近日嘅共通點，係除咗前日分別搵較低組別球隊磨刀贏波，就係正力抗西甲挖角潮；兩軍主帥安察洛堤（肥安）、雲格就誓神劈願話，各自主將艾殊利高爾（A高爾）同埋法比加斯來季一定留隊。問題係，到底佢兩個真係咁老定，定係一廂情願死撐？
兵車友賽齊贏波
先講阿仙奴，雲格喺球隊前日大炒英乙班列特4:0後，老正被追問法比加斯嘅前途，佢好唔耐煩咁回應：「呢件事已經講得太多，對球隊一啲好處都冇；我講過好多次佢（法比加斯）想留隊，而我哋亦唔會放佢走，希望呢單轉會風波正式告一段落。」講係咁講，係人都知法比加斯同巴塞隆拿關係千絲萬縷，睇佢早前贏世界盃後被西班牙隊友笠巴塞波衫嗰個開心樣，都幾難信佢冇離心。雲格，咪咁老定。
雲格為法比仔去留一事心煩，但睇隊波前日大炒班列特後應該令佢釋懷。呢場波，艾沙維、拿斯尼都有波入、小將積森遜更梅開二度；至於新加盟嘅查馬克下半場首次落場處子演出，踢咗45分鐘後初步畀人感覺有板有眼。
肥安：A高爾肯定留隊
車路士領隊肥安嘅處境同雲格好似，麾下戰將A高爾正被皇家馬德里挖角，佢回應A高爾前途嘅時候態度更加堅決：「佢（A高爾）去季為球隊貢獻良多，我可以百份百肯定，佢來季一樣係球隊重要棋子。我哋未就佢去留問題傾過，根本冇必要。」冇傾過都講到咁肯定，肥安，會唔會老定得滯？
車路士前日友賽英冠水晶宮排出超殘陣，只靠施治、艾辛、阿歷士洛里高、約翰米基爾支撐，依然夠贏1:0；睇見艾辛傷癒復出即射入全場唯一入球，肥安心情應該靚晒。