小妹早幾日去咗宜蘭童玩藝術節，玩到濕晒身，話就話係「童玩」，現場唔少辣妹同美少女着住三點式玩水跳舞。濕身唔緊要，最緊要有地方住，最近童玩節冬山河親水公園會場，係香格里拉冬山河度假飯店，踩單車唔使10分鐘就到會場。
呢間座落河邊嘅飯店外牆白色，加埋風車好有希臘feel。老闆張清來話，飯店由二人房到六人房都有，童玩節一泊二食套餐，二人行每人2,800新台幣起（約港幣700元）。網址 http://www.shangrila.com.tw/
山岸森林會館天花板開得
遊宜蘭，唔少港人選擇住民宿，用成4,250萬新台幣打造嘅山岸森林會館（ http://www.river-forest.com.tw），號稱宜蘭最大民宿，有三棟大樓，其中一棟villa仲係建喺水池上，小妹入房一睇，地板有塊半月型透明玻璃，見到啲魚游嚟游去；有啲房天花板開得，夜晚可以數星星。有間房入邊有私人泳池，房價只係新台幣5 ,700元（約港幣1,425元），包早餐。民宿老闆林渭川話，房價最平3,900元起（約港幣975元），送埋兩張童玩節門券。
只有九間客房嘅民宿三月三（ http://www.yilanminsu-303.com），每間房設計不同，大堂有八米高，啲房又大又有品味，相連嘅陽台都成500平方呎，喺度睇日出、睇稻田，或免費借民宿單車踩落田，真係好relax。經常哈哈大笑嘅老闆黃大明話，特別推出港人住宿優惠，9月入住連續兩晚，免費享機場至民宿接機或送機服務。而二人或四人房連早餐，都只不過係新台幣5 ,800元（約港幣1,450元）。
電郵：mailto:[email protected]