年少輕狂，誰未試過？溫拿出身的譚詠麟（阿倫），當然也曾年輕過、搖滾過、瘋狂過。夾band之路難行，箇中辛酸苦楚，比誰人都更清楚。面對一班熱血band仔，阿倫恍如看到昔日的自己，用盡千方百計帶Mr.進樂壇，為的，只是延續未完的搖滾之夢。撰文：胡比
譚詠麟當初得知Mr.成員Alan與Dash有心夾band時，眉頭一皺，只叮囑他們夾band一定要夾人，思想一致，理念一致。兩人將話牢牢記住，默默等待發光發熱的時機。機會來了，蓄勢待發的Mr.在阿倫的歌迷聚會上初試啼聲，他們的忘我表現讓阿倫感受到他們的誠意，決心提攜這幫熱血青年。
阿倫日前笑說：「佢哋成日話要多謝我，其實應該多謝Duncan（環球高層黃劍濤）先啱。最初同Duncan講，有隊bandOK喎，試吓捧啦。Duncan就話：『要捧隊band好難，得唔得o架？』我覺得有冇咁難呀，於是落手落腳，不停同Duncan講家有個寶藏，睇吓你識唔識發掘，係爭咁啲資源，講咗起碼10次。」
笑MJ眼線蘊藏深度
阿倫的眼鏡還沒摔破，Mr.出道3年，去年憑一曲《如果我是陳奕迅》紅到發紫，接着又在紅館舉行演唱會，前途錢途無可限量。Mr.獲阿倫如此寵愛，連他們也說不出因由，成員MJ坦言：「校長真係我哋嘅恩人，都唔知點解佢咁錫我哋，可能大家都係夾band出身啩。又可能覺得我哋似孤兒仔，想救我哋，唔知係咪知我哋窮，每次同阿倫做嘢，佢都會請我哋食飯。」阿Tom則揚言以阿倫為榜樣：「人總會有情緒，但佢好似係零負面嘅人，呢樣嘢我仲未學到。」Dash說：「校長諗嘢好闊，但唔會好明顯咁同你講，要你自己去感受，去消化佢所講嘅嘢。咁樣令我印象更深刻，有時阿媽同我講嘅嘢我都未必記得。」Alan則說：「每次同阿倫合作，就可以證明到佢係25歲，活力充沛。」
一頂頂高帽照頭笠，阿倫又怎看這五位後輩呢？阿倫說：「咪睇Ronny只係半個中國人，又咁靚仔，好似成日媾女咁，其實係啲女仔鍾意佢，唔關佢事o架！佢寫嘅詞好好，睇完佢寫嘅嘢，真係對佢另眼相看。」接着取笑MJ：「唔好以為MJ淨係識畫眼線，其實好有內涵，一筆一畫都好有深度o架。」又讚阿Tom有打鼓天份：「其實鼓手喺band中好緊要，阿Tom進步得好快，大把前途。」
「唔會有人專登抄歌」
阿倫形容Dash猶如當年自己在溫拿中的位置：「Dash就好似成隊band嘅大佬咁，好多整體主意係佢一人負責，接咗嘢做就會分析，然後解釋畀隊員聽，推動大家去做。」至於主音Alan，阿倫卻說：「Alan係我最估唔到，原來佢咁冇自信。」
Mr.的成名路也遇過阻滯，他們的歌曲經常被指抄襲，被網民窮追猛打，寫給阿倫的《Mr.Tam》更被指是BonJovi的《It'sMyLife》的倒模之作。身為樂壇校長的阿倫直言：「呢首歌係我叫佢哋做嘅，音符來來去去都係嗰幾個音，意思同編曲都唔同，唔會有人專登去抄人嘅歌，佢哋又唔係攞住隻歌嚟抄，係夾band夾出嚟，最重要知自己做緊乜，做好自己嘅嘢就得。如果真係抄足成首歌，一早俾人告啦！」
Mr.盼聽眾感受歌詞
校長的體恤是最強的強心針，Mr.完全沒有負面情緒，Alan說：「真係冇唔開心，只希望大家唔好只係留意首歌係咪抄，用心聽吓感受，聽吓啲歌詞講緊乜，唔好浪費咗我哋一番心機。」阿倫更有感而發的說：「其實好多時明星係傳媒捧出嚟，如果香港娛樂圈只係得緋聞同負面新聞，香港真係會冇晒明星囉，扼殺咗好多嘢！」阿倫對Mr.寄予厚望：「佢哋嘅音樂真係捱出嚟，有誠意。以前曾幾何時，香港嘅音樂領導亞洲，由香港發出去，但家就係人哋嘅音樂，好似台灣、內地、韓國嘅音樂進佔咗，真係好希望有日香港樂壇可以再次成為華人樂壇嘅重點位置。」
廢噏儍笑紓壓
阿倫簡直錫到Mr.燶，最近還與他們合作推出粵語加國語專輯《RollingPower》，阿倫說：「我覺得佢哋係時候再進一步，以前淨係得Alan一個唱，叫其他人開口，可能要行雷先得，今次呢隻碟唔同，個個都有份唱。原地踏步只會被後浪冲走，要等人哋知道佢哋唔係淨係識得唱rock。」
Dash表示當初阿倫提議合作出碟，第一個反應是怕能力做不到，令校長失望，他說：「同阿倫一齊出碟喎，有邊個香港人唔識阿倫嘅歌呀，但我哋出道三年咋，距離相差太遠，真係有壓力，好彩校長都好識得幫我哋紓緩壓力。」
先讚後踩
怎樣紓壓？六人即場示範，阿倫扮黑社會大佬，笑問Mr.：「喂，點呀，條數收到未呀？仲未收到，點做嘢o架？」之後Mr.各人廢噏一餐，儍笑一番，阿倫笑說：「我冇畀壓力佢哋o架，係佢哋畀壓力自己，知道佢哋有壓力，咪講笑，等佢哋放鬆。好似錄音唔好，我唔會踩咗先，點都讚咗先，係咁話好，等佢哋放鬆咗，感覺舒服，放慢腳步，再錄嘅時候就冇咁緊張，效果自然好好多。」
攝影：林德雄
場地：日航酒店
譚詠麟髮型：PernyTangofSilkcutSalon
化妝：AliceLau