鴨脷洲「南灣」開售，百利保（617）與控股公司世紀城市（355）一樣咁肥，買落後，買世城。百利保應佔南灣樓面約27.4萬平方呎，而南灣食正新盤熱銷潮，就算好保守以平均呎價1.8萬銀、純利率50%計，百利保已可獲利24.7億銀。
至於控股嘅世城，以應佔百利保權益所計嘅溢利，亦達14.2億銀，幾乎同本身市值14.5億銀睇齊。單係呢個盤所提供嘅保守溢利，折合PE1倍咁大把，世城一樣肥仔水。世城每股NAV1.42元，連南灣潛在溢利反映，NAV上到2.02元，折讓挨近70%，吸引到爆。再講，百利保1年累升1.27倍，世城同期升幅都係62%，跑輸幾條街，世城又有追落後條件。博世城翻半番到0.91元，折讓仲講緊超過50%，實情大把向上收窄空間。
莊中轉盈折讓大
莊士中國（298）公佈2010年度（3月底止）業績，由09年度出血1.2億銀，轉盈5383萬銀，收入兼大增兩倍到3.8億銀，透過內房銷售支持業績，紮實好多。又莊中最新每股NAV1.25元，現價（0.52元）折讓58%，呢個折讓，仲未計可供發展物業面積過2000萬平方呎嘅增值潛力，已經好吸引。呢轉冷吼，博莊中折讓係咁易收窄到50%，現價潛在回報率20%。
錢雋