7月唔見有鬼片！反而多愛情片？今個星期港產有隻《志明與春嬌》值得一煲，這套搞鬼又賤格得嚟，故事又相當有趣嘅小品愛情劇，加咗啲法國浪漫元素，但仍然保留地道愛情片嘅風格，放假煲碟笑一笑啱晒！
記者：許福合
因粗口而投入
辦公室禁煙，好事定壞事？食煙者癮起，被迫行多兩步自然唔方便，不過又創出新社交活動「打邊爐」！故事就講到原本一班三九唔識七嘅人，圍埋打邊爐，吹水而相熟，繼而談戀愛！故事簡簡單單，聽住地道嘅粗口，香港人睇倍覺投入，志明與春嬌因打邊爐而熟識，志明剛剛分手，春嬌維持住一段淡而無味嘅關係，二人相遇立即起火花，正係「姣婆遇着脂粉客」。
背光效果出色
《志明與春嬌》全片106分鐘，唔算好長，製作質素雖然唔及外國大片，不過勝在無悶場，導演使用幾段古仔串起整套電影，而每段故事拍出來效果都相當深刻，雖然無乜火爆緊張場面，但觀眾唔經唔覺就睇完，近期睇碟好少有。
好多人對港產片都覺得唔使買Blu-ray，買DVD慳番啲，不過這套《志明與春嬌》導演使用很多背光技巧，在千嬅身上特別用得多，視覺效果相當唔錯，尤其好多香港平民化嘅後巷打邊爐熱點，戲中會發覺靚咗咁多，買Blu-ray就可見識一下。
叫人戒煙
睇完成套戲，好多人會問《志明與春嬌》點解會被定為三級呢？無露點又無色情，又唔係講黑社會，只係一套愛情片！當中只係有好多港人生活中常出現嘅粗口，咁都係三級片真係幾荒謬，而且戲中演員爆粗都比較「順耳」，唔會為講而講，全片睇落好有現實感。
睇完正場記得睇埋Bonus，Bonus都幾多嘢睇，必睇嘅有製作特輯，唔講唔知，雖然片中男女角都係煙鏟，但余文樂同千嬅不約而同都話片場太多人食煙，好難頂，千嬅仲話要身邊人戒煙！
Profile
聲效：DTS-HDMasterAudio7.1/DolbyDigital5
字幕：繁、簡體中文及英文
片長：106分鐘
