西九文化區管理局請老外謝卓飛做行政總裁，要幫佢搵個行政總裁辦公室主任做「盲公竹」，西九管理局噚日宣佈呢個「大內總管」由馬會前高層黃寶兒出任，8月2日履新，同時係董事局秘書長，協助對外聯繫工作。
黃寶兒讀大學時主修音樂，喺英國取得律師資格，曾在英國及香港從事法律工作，05年起做馬會慈善事務部主管，負責慈善捐款、人事管理以及行政事務，新、舊工作都有一大嚿錢可以使，應該勝任有餘。
西九管理局最新電子通訊訪問咗表演藝術政策及管理事務行政總監茹國烈，好多人形容西九係「肥豬肉」，如何分配資源充滿利益衝突，茹國烈認為不存在衝突，好理想咁話成熟社會，藝術資源可以來自不同領域，不同機構應有良性互動關係。