「做人如果冇夢想，同條鹹魚有乜分別？」周星馳大概還未諗到，鹹魚都會翻生。15年前，在叱咤頒獎禮奪得女新人銀獎的羅敏莊，因為唱片公司高層大地震而震碎了歌星夢，在樂壇一閃即逝。今日，她卻憑《超級巨聲2》中一喊成名。對於被喻為鹹魚翻生，羅敏莊笑說：「我係鹹魚，但未算係翻生囉。」
撰文：戴彩煥
現年35歲的羅敏莊，95年簽約華納唱片公司闖樂壇，一曲《挑戰者》不僅火速成為熱門K歌，她更在同年《叱咤樂壇流行榜頒獎典禮》中奪得女新人銀獎，成績僅次奪得金獎的陳慧琳。可惜好景不常，羅敏莊起步不久，便因唱片公司高層大地震，及與經理人安格斯鬧翻而消失樂壇。
公司地震生不逢時
多年來，羅敏莊一邊拍劇一邊推出發燒HiFi唱片，但她的歌星身份早已被遺忘得一乾二淨。直至早前她在《超級巨聲2》與參賽者合唱《挑戰者》，評判倫永亮一句：「我好希望現今香港樂壇有多啲羅敏莊呢類型歌手」，令羅敏莊一喊成名。
對鹹魚翻生這個形容詞，羅敏莊日前接受訪問時笑說：「我唔介意，都係事實。我係鹹魚，但未算係翻生囉，只不過有人知道原來我識得唱歌啫，如果能夠追番我同期出道嗰班歌手咁嘅級數，就真係翻生啦。」
回想做歌星的風光日子，羅敏莊慨嘆一切來得太短暫：「幸運嘅時間實在太短，我一出道已經同陳慧琳企埋一齊攞獎，陳奕迅同楊千嬅都係我下一年。我係黃柏高年代，嗰陣佢離開華納成立正東，捧陳慧琳，我就變咗孤兒仔，跟住李進入華納，帶咗鄭秀文入嚟，我又變咗孤兒仔。嗰陣唔單止唱片公司轉班底，我同經理人安格斯又搞到好唔開心，令我喺呢行直情消失咗。睇住同我同期嘅歌手慢慢去到天王天后級，但我仲係停留喺一個咁低位置，其實我係鹹魚咗、係死咗o架！」
羅敏莊表示，經理人對她作出的承諾很多也沒有兌現，令她對樂壇心灰意冷，主動提出離開：「我話想走，佢（安格斯）話一係你唔做呢行我就放你走！咁咪算囉，因為我真係好唔開心，諗住唔做呢行。嗰陣港台DJ梁奕倫、李志剛同杜雯惠叫我入電台執頭執尾做住先，於是我就入咗港台打文件同聽電話。」
委身電台百般滋味
由歌手變成聽電話的助理這兩年時間，是羅敏莊人生最低潮最谷底時期，尤其是接聽電話時遇上自己同期出道歌手，滋味特別難受，她說：「同我同期一啲好friend嘅歌手，佢哋已經發展得幾好，佢哋見到我聽電話……個感覺好難受，佢哋仲做緊歌手，我就喺度聽電話。同期嘅陳奕迅、陳慧琳同楊千嬅大部份見過我喺電台聽電話，我覺得自己真係鹹魚、死咗一樣。」
儘管未試過遭人白眼，但昔日經常一起作樂的歌手朋友，卻一個一個的遠離，令羅敏莊體會到甚麼叫現實，她說：「以前曾經一齊玩嗰班，都唔會同我一齊玩，不過呢樣嘢我唔恨，因為大家企喺唔同級數……可能自己有少少自卑心作祟，大家都唔同level、唔同圈子，你都見到人哋冇乜點睬你，就知道大家地位唔同咗。」
經歷抑鬱學識放低
很多人會為自己不濟遭遇而傷心痛哭，羅敏莊也不例外，甚至患上抑鬱：「好多藝人會搞到精神失常，自己嗰陣時都覺得有啲咁嘅問題，諗諗吓嘢會喊，同人傾傾吓偈又會喊，睇到電視啲人唱成咁，又會同人嘈交，情緒好低落，開始發現自己有呢個問題，所以盡量叫自己放低。」
在電台捱了兩年，羅敏莊終於等到經理人合約屆滿重新振作，在港台開始了她的DJ生涯，另方面，她還主動向無綫撈，羅敏莊說：「雖然我做歌星嗰陣喺TVB做過主持，但再入番去梗係唔會有呢啲位畀你，我有晒心理準備入到TVB係由低做起、做臨記之類，結果都算好好彩。」
加入《勁歌》珍惜機會
羅敏莊去年與拍拖7年的陳國邦拉埋天窗，以為從此安安份份做陳太，完全沒想過倫永亮一句話會令她事業再現生機。羅敏莊：「自己努力咗咁多年，突然有個咁有份量嘅人講嗰番說話出嚟，真係好感動！我哋慣咗冇乜人留意，家有人認同，所以忍唔住喊！」
稍後羅敏莊加入《勁歌金曲》做主持，對於《勁歌》收視低迷，羅敏莊揚言不會為她帶來任何壓力：「好多人話我啃咗嚿豬頭骨，但我唔係一個可以將收視拉高嘅人，所以對我嚟講冇壓力。我以為結咗婚就冇o架啦！初初我唔肯同阿邦結婚，係怕定咗型做《都市閒情》，我唔想淨係做《都市》，都好想拍吓劇，所以唔敢結婚住，到早幾年我開始被安排做師奶角色，做人阿媽，我開始諗：『唔……都係時候可以結婚啦！』家我變咗少婦都有人搵我做《勁歌》主持，我覺得都係一個幾好嘅機會嚟o架。」
睇好G.E.M.靚聲上位
近年不少歌手如鄧麗欣（Stephy）等頻頻被批評走音，羅敏莊認為錯不在歌手本身，她說：「喺我之後，樂壇有段時間係捧靚、唔使識唱歌嘅少女。我覺得唔應該怪走音嗰啲，怪都怪簽佢哋嗰啲，怪佢哋一窩蜂。」
羅敏莊續說：「呢個社會係咁，《阿凡達》收得，就全部拍3D；少女掂，就全部捧少女。但近幾年情況變番好咗，都會捧番啲創作歌手。」現今樂壇，羅敏莊最欣賞陳奕迅、鄧紫棋（G.E.M.）、側田和小肥，認為他們都是靚聲兼唱得之人。
老公大讚唱得又煮得
羅敏莊接受訪問當天，陳國邦做廿四孝老公陪伴在側。對於太太在《超級巨聲2》中真情落淚，陳國邦也備受感動，他說：「好似出咗一口氣！我同太太喺行內認同感好大，得到監製同演員嘅欣賞，但咁多年嚟只限於欣賞。身為娛樂圈人，梗係希望得到廣大認同，先至彰顯到成就同事業成功。當我睇到倫永亮講嗰番說話，我都有喊，戥太太開心，兩個人相處咗咁耐，我好明白太太心態、好明白佢嘅感受。」
龍蝦湯最滋味
不說不知，原來陳國邦與羅敏莊拍拖之初，不但不知道她是自己演藝學院師妹，更不知道女友是歌手出身，陳國邦說：「好多時佢放工返嚟，會同佢一齊研究啲戲做得好唔好，佢唱歌方面我就畀唔到意見，因為我唔係唱歌出身，但就睇到老婆好專業。有次佢做個發燒音響展覽，為咗保持original感覺，佢放棄用MMO，請咗個結他手一路彈一路唱，好有心思，身為表演者好尊重佢嘅表演。」
那麼，作為太太又有何評價？陳國邦說：「更加冇得頂，佢煮嘢食好犀利！佢以前唔識入廚房煮餸，家連龍蝦湯都掂，味道仲係酒店飲嗰啲水準㖭。」
