陳偉業在立法會講有「政治淫媒」，實在太過霸道，尊貴的議員指桑罵槐，指不同意見的尊貴議員或人士係「政治淫媒」實在出言粗卑，愧為議員。
平日收到不少垃圾電郵，日日刪除，不勝其煩，但有啲幾有娛樂性，幾好笑，點解世界上有咁多人咁得閒，諗埋晒一啲白癡先至會上當嘅「祈福黨」舊橋嚟呃人嘅呢？最常見嘅垃圾電郵就係賣偉哥，其次就係在深圳代開發票，呢一輪就日日收到冒認銀行職員嚟攞資料，上星期就收到一封自稱係柏克萊銀行（加納分行）、尼日利亞政府、東亞銀行星加坡分行、世界銀行，甚至自稱聯合國秘書長潘基文嘅電郵，全部係講有錢可分，有生意可做，要電郵收件者回覆地址、電話、電郵、ATM卡號碼等等，搵鬼信咩。
前一排睇到爭產新聞，令人難明所以，就係羅定邦家族官司透露佢有一位失咗蹤嘅兒子可得三分一遺產，直情係偵探小說！去邊度搵呢個失蹤兒子，或者有冇人走出嚟自認係羅定邦兒子，還不知道。左丁山與一班前輩在賽馬車會食飯，佢哋個個有資格留下家財，於是互相開玩笑：「你有冇失蹤兒子呀？」笑得過癮，覺得賽馬車會隻炸子雞特別好食。
點知返到寫字樓，下午又有垃圾電郵到，來郵人自稱係東亞銀行星加坡分行總經理，地址係星加坡羅便臣道六十號。電郵聲稱五年前印尼海嘯，有一位銀行客戶身亡，遺下四千二百九十萬美元在銀行戶口內，無人認領，但銀行從各種記錄中，有理由相信電郵收件人與死者有親戚關係，希望收件者往星加坡認領遺產，然後分番二千五百幾萬美元俾呢位總經理與銀行職員！
嘩！公然收賄？直情笑到碌地，唔通羅定邦有失蹤兒子，左丁山有失蹤富豪親戚咩？立即打電話通知東亞銀行嘅老友記。老友話：「你唔係第一個收到呢封電郵，電郵絕不可信，我哋已收到其他人士通報。我哋正在調查緊！」呢啲嘢，上《警訊》都嫌過份虛假，偏偏有人樂此不疲，奇哉怪也。如果有人相信而蒙受損失，更加匪夷所思。