小妹早輪飛去上海玩世博，搭飛機去上海浦東機場要兩個半鐘，落機搭啲士去巿中心又要成個鐘，以前都冇乜所謂，個個外地遊客都係咁搭，鬼叫離巿中心半小時車程嘅浦西虹橋機場定位為內陸機場咩，真係谷住條氣。台灣嘅台北松山機場上月就同虹橋機場通航，台灣即刻升級變咗係中國嘅自己人，當我哋係外人啦。
接通長三角市場
明剃曾特首眼眉喎，好彩運輸及房屋局做番啲嘢，噚日公佈同中國民用航空局經磋商，終於可以同上海虹橋機場通航，兩方每周合共營運28航班。通航日期目標係今年10月或之前。
政務司司長唐英年噚日即刻出聲攞彩，佢話上海虹橋機場同高鐵、城際鐵路、高速公路、磁懸浮、地鐵、地面公交等接軌，係進入長三角的重要門戶，進一步接通長三角龐大市場，同埋方便咗兩地旅客。
小妹老早都知啦，喺虹橋機場落機唔單止去巿中心方便，好似去南京東路，半個鐘都唔使，去其他城巿都好快，一出機場經鐵路就可去蘇州、無錫等地，幾十分鐘就得；喺浦東機場就要等巴士，車程遠班次又疏落，唔少旅客寧願搭個幾鐘車去虹橋，再去其他城巿仲化算。
家香港機場同虹橋通航一天都光晒，雖然要10月先開，遲就遲過台灣，好過冇啦。家港龍同國泰有16班航班飛上海，其中國泰有三班。佢哋都話會爭取開辦航班飛虹橋。
電郵：mailto:[email protected]