學生多數臨近暑假尾聲，先至收拾心情趕做暑期功課等開學，高官議員相反，暑假開始前要完成立法工作先可以去度假，因此每年立法會暑期休會前，例必出現馬拉松式會議，今年都冇例外。由於最低工資條例草案十分具爭議性，因此要連續開會多日，總共拗咗幾十個鐘頭，甚至要通宵開會，就算唔係破紀錄，都足以寫入本地立法機構歷史。
立法會不設用膳時間
香港立法實行最低工資，呢件歷史性事件噚日加插歷史性插曲。話說負責條例草案嘅勞工及福利局局長張建宗，一連三日留守立法會作戰，與議員就各項修訂周旋兼箍票，雖然無廢寢，但肯定忘餐，據講其下屬多次叫局長去食飯，食飽再作戰，不過張建宗拒絕行開，堅持作戰到底。
關心勞工福利嘅李卓人雖然同張建宗對着幹，不過都好關心算係「打工仔」嘅張建宗，會唔會因為工時過長影響健康，三番四次勸局長去食飯。見到「官不聊生」苦況，主席曾鈺成終於唔忍心，噚日為咗張建宗，破天荒暫停會議20分鐘畀官員午飯，仲邀請局長到立法會宴會廳食番餐安樂茶飯。
殖民地年代立法局會議，人人係橡皮圖章，開會幾十分鐘就收工，仲有時間下午茶，後來加入民選議員，開會時間越來越長，但一直不設午餐晚飯時間，官員、議員只可以趁會議空檔期間食飯，家陣會議日以繼夜，好多時一日幾餐都要在立法會內解決，曾鈺成噚日嗌停會議「放飯」，可以話係一個歷史性決定，為立法會設食飯時間立下憲制性先例，還官員有飯食呢項基本人權，歷史意義隨時不下於最低工資立法！
葉劉恐一人唱獨腳戲
今次馬拉松式會議何止搞到官不聊生，受害人仲包括葉劉，事關佢提出有關塌樹嘅辯論，由星期三等到今日先開始，佢十分擔心議員開完幾日會後，戰鬥力下降而唔發言，令佢呢個辯論草草收場。因此噚日不斷提醒其他議員多多支持開腔發言，否則得佢一個人唱獨腳戲就冇癮啦。
mailto:[email protected]