民主黨轉軚支持政改方案備受批評，江湖傳聞有退黨潮，近期亦有唔少新黨員加入，其中一個原來係黃成智個仔。黃成智個仔忽然白鴿上身，原來同7.1遊行有關。當日佢請纓做義工，負責打頭陣組成人鏈「保護」黨內一眾領導，包括佢老竇，經此一役，竟然激發佢入黨意欲，7.1後同幾個年輕義工交表申請入黨。
黃成智兒子年僅18歲，一直有幫老竇手做地區工作，去年暑假曾到黨友胡志偉辦事處實習，似乎對政治幾有興趣。黃成智稱兒子會考成績唔係太標青，「僅僅熟」升預科後，最近一次考試竟然考第一名，個仔終於開竅，令佢「老」懷安慰，至於個仔想唔想繼承父業參選從政，暫時就唔知嘞。