美食如美女，評價有時好主觀，CNNGo中文網站選出40種香港不能欠缺嘅美食，由香港街頭小食到東南亞名菜都有，不過好多人睇完呢個美食名單，都認為未夠全面，食家蘇施黃、陳思祥都覺得有遺漏，CNNGo編輯噚日睇完《蘋果》，承認掛一漏萬，即時從善如流，喺40項推薦美食以外，追加10種食品。
新增10樣推薦美食，第一位係香港獨有嘅碗仔翅，第二位就係阿蘇點名應該上榜嘅白粥、油炸鬼，CNNGo話呢兩樣嘢確係港人集體回憶，不能遺漏。有白粥、油炸鬼，點少得腸粉？順理成章係第三位。
如果上述係香港傳統美食代表，鴛鴦堪稱香港中西文化交融嘅icon，不能隻字不提；40大既然有菠蘿包，冇理由缺了雞尾包，因此CNNGo補充埋佢，港人食壽司怕且多過食白飯，因此入圍有理。八方覺得最有sense嘅選擇，非撈丁莫屬，絕對係茶餐廳殿堂級美食。
