政府成日話公職人員任期原則上六年為上限，做夠期就要退位讓賢，不過煲呔政府親疏有別，呢啲規條可以彈性執行，噚日再委任胡定旭續任醫管局主席兩年，至2012年11月底。
肥胡04年獲委任掌管醫管局，任內有何功績呢？如果問病人權益組織，八方相信佢哋對肥胡評價毀多於譽，皆因近年公立醫院事故無日無之，醫療失誤鑊鑊甘，雖然個快勞花晒，不過政府發言人噚日狂笠肥胡高帽，讚揚佢有豐富經驗同領導才能，對協助醫管局履行日後任務有極大幫助。
肥胡則話對冧莊感到非常榮幸，承諾繼續努力服務市民，又話再獲委任係政府肯定醫管局工作表現，佢感謝醫管局所有員工對佢堅定支持。