導遊明目張膽劏客，有旅行社老闆承認，強迫團友購物利潤豐厚，一團動輒可賺六至七萬元，誘惑難以抵擋。即使旅遊業議會高調介入，旅行社也可以使橫手擺平團友，以致事件不了了之。導遊工會則批評，旅行社以賣團形式聘用導遊，迫使導遊劏客。
自僱接團收入不穩
一名不願披露姓名的旅行社老闆不諱言說﹕「好多旅行社呢幾年都係靠劏大陸客搵錢，所搵嘅錢係天文數字。好彩嘅話，一個團可以搵到六至七萬，導遊大約拆到兩至三萬。外界話導遊冇底薪所以要劏客，其實，好多導遊都寧願自僱形式帶團，因為賺得仲多，包薪一個月得嗰兩萬。」
政府與旅遊業議會對連串劏客醜聞束手無策，旅行社老闆指出，很多時候，是因為旅行團團友拒絕現身作證，原因有很多，其中一個是被投訴的旅行社快一步，使橫手擺平事件，例如暗中賠償等。
導遊代表則否認他們寧願自僱也不要包薪，香港旅遊業（外遊）領隊及導遊工會主席湯劍生表示，因為自僱接團收入極不穩定，所以很少導遊願意出錢包團，現行做法只是逼於無奈。
湯劍生說，現時很多旅行社以低於成本價接待內地旅行團，然後以賣人頭方式判給導遊帶團，導遊須按人頭付錢接團。導遊要有錢賺，就須靠旅客購物回佣。
湯劍生說﹕「我唔贊成導遊咁樣對待旅客，但主謀係旅行社同旅遊業議會，導遊不過係幫兇。」
本報記者