世界盃曲終人散,足球版編輯T鬆咗一口氣,不再緊張,打電話嚟傾足球,佢嘅觀點幾特別,但可能有球迷認同,否則英超球賽唔會有咁多人睇。
編輯T話:「西班牙的確好波,抵佢攞冠軍,我阿爸話睇西班牙短傳滲入,非常好睇,令佢想起當年姚卓然嗰一代球員在修頓與麥花臣球場踢小型球,阿爸話小型球場面積較細,個波又細,着白飯魚踢波,如果高Q大腳,就好容易踢出界,所以一定係傳球滲入,傳到空晒位嘞,姚卓然就細細腳交波畀企在禁區內嘅霍先生抽射入網。現在西班牙好似係用小型球踢法嚟打大足球,搓到對方頭暈為止。沙維、恩尼斯達等等球星嘅技術冇得頂,控球好似有膠水黐腳,絕唔會好似英格蘭球員咁,用腳接波,竟然會將個波彈開三呎遠,俾德國隊搶咗、快攻、射入!好波就好波嘞,我哋做觀眾,覺得好悶啫,西班牙一味傳球,好似玩落磨,玩死對方馬騮為止,有時候玩足三四分鐘,我幾乎瞓着咗!」
哦!人哋好波好技術又話悶,唔好睇,點樣至好睇呀?編輯T話:「英超咪好睇囉,大家鬥追鬥搶,呢邊射唔入,眨吓眼個波已經到咗另一邊,禁區內撞到飛起,幾刺激呀。睇電視直播足球,英超係AllAction動作片,打得燦爛,技術就或者粗糙啲,睇西班牙,就好似睇文藝片,要慢慢欣賞,互相了解,唔啱茶餐廳文化嘅。」
英國文化人曾經話,足球運動源於工人階級,粗魯不文,知識分子嘅運動係板球cricket(左丁山嘗試睇過幾次板球,悶到抽筋,就算係睇板球嘅變種,棒球,一樣悶,十幾年前,左丁山與老闆應日本財團之邀,在東京後樂園球場睇波,坐最佳座位──即捕手後面一排較高座位,一樣睇到提早離場),有此原因,叫英國球員做文藝片,似乎搵錯對象。英國人踢英超式足球虎虎生威,但佢哋一踢國際賽就東施效顰,要拖慢嚟打,於是乎粗糙技術露晒底,輸多過贏。