蔡卓妍（阿Sa）財多身子弱，本來噚日佢要去上海宣傳，但去赤鱲角機場途中感到不適，要即刻取消行程改去醫院求診。佢嘅經理人霍汶希噚日喺電話度話：「阿Sa今朝去機場時，見頭暈唔舒服，呢排又操勞得滯，所以冇上機，去咗醫院睇醫生，佢睇完返咗屋企休息，冇乜大礙，係頻撲得滯。」
阿Sa噚日就甩底一事喺微博道歉，希望粉絲、同事同相關單位體諒。佢又留言話：「這陣子一直在生病，一直在吃藥，藥太多，胃不能承受了，今天本來要到上海出席馬路天使的宣傳活動，出門前胃又不行了，又暈又吐，最終要到醫院打針才紓緩過來。」阿Sa仲張貼全日主食嘅相片，就係鹹蛋加白粥。
傳染畀朋友
另外，阿Sa近日應該同黃浩然老婆、任職形象師嘅家嘉見過面，原來家嘉又係屙嘔不適，阿Sa透過微博話係自己傳染畀佢，但家嘉話：「不會吧！你也快快休息吧！」兩個病人互相安慰。
其實近年阿Sa經常捱到病，仲試過突然暈低。過去一個月，佢試過因為體力透支缺席《鎗王之王》首映，日前佢喺橫店趕返港開簽唱會，又呻當地成40度，令佢中暑，睇嚟阿Sa真係要保重呀。