農業銀行A股噚日掛牌，收市微升0.75%，冇破發，但都冇冲喜。
前晚花旗股市雖然反覆微升，但向上嘅動力似乎正在退減，加埋噚日內地股市下跌，港股冇晒力，恒指越跌越多，最後報收20255，唔見305點。恒指短線應該可以守住19850至20000嘅支持區，上落市格局冇變，不過大市氣氛差咗，今日農行H股（1288）掛牌就唔敢睇得太好。
東亞C輪22965：東亞銀行（023）噚日報收28.95元，升1個位，算係逆市靠穩。大市成交冇大變，但東亞嘅成交就大增，維持近日向上嘅形態，後市有機會破30元，揸耐少少睇31.50元，可以諗吓隻C輪22965。
隻輪現價19.3仙，2010年12月30日到期，行使價30元，溢價10.3%，引伸波幅31.6%，槓桿率15倍（有效6.9倍），正股升上31.50元，22965睇33.6仙，正股跌穿28元就沽咗隻輪。
俊樺