誰說女藝人只能做花瓶？伍詠薇選美出身，但她證明給大家看，樣靚之餘也有腦袋。在娛樂圈打滾十多年，還已為人妻，但她仍為未來作計劃，今年她會暫時息影一年，與老公合作，進軍商界推銷她的「美人專門」瘦腳產品。
伍詠薇早前為宣傳自己代理的瘦腳產品接受訪問，變了女強人的她，說話仍然開朗爽直，她說：「幾年前我去日本，有朋友介紹我用，我覺得好好用，港女心態梗係要買多啲，點知係美容院產品，市面上冇得賣，後尾我覺得好有效，直情同老闆講，想佢畀我代理返嚟香港賣。」
夫妻有共識
由用家到成為代理，當然不是易事，伍詠薇說：「我用咗三年時間同佢傾，本來人哋冇需要發展外地市場，自己本土賣都賺好多錢，我係用誠意打動佢哋。」
自言做生意甚麼也不懂的伍姑娘，拿着一個信念「不驕傲不氣餒」來開創新事業。今次投資七位數字，與丈夫練海棠合作做，她不擔心夫妻檔會出現爭執傷感情，她說：「我見過好多夫婦一齊做嘢意見分歧就會鬧交，我唔想咁樣，我明白做嘢實會各有意見，事前我哋有共識，如果將來大家意見分歧，大家唔好急，退一步海闊天空，有乜事慢慢傾。」
不捨棄演戲
為了這個生意，伍姑娘將會暫別演藝事業一年，她說：「我向公司請假一年，最初同樂小姐（樂易玲）請假，佢教我要有保留，放低一年時間去試，若果失敗都可以返娘家，當然要我放棄做戲我又唔想。」
採訪：王連連
攝影：葉君海
場地：Post97
髮型：BowieofHair
服裝：Charcoal