今年書展主辦單位唔畀周秀娜等一班o靚模搞簽名會，話活動意識不良或品味低俗，但美國有線新聞網絡CNN旗下網站CNNGo.com，卻視周秀娜為香港性感代表，不但詳細介紹娜姐點樣成為香港o靚模一姐，又讚佢成日超時工作，又作多樣化發展，確保最大曝光率，仲提及佢過去曾出席科技大學座談會。
CNNGo.com號稱係以最地道嘅筆觸介紹亞洲多個城市嘅旅遊指南，喺香港部份，除咗介紹飲飲食食，仲特別訪問咗周秀娜，娜姐喺3分幾鐘嘅訪問片段中，除咗講佢家庭背景、自細志願等例牌嘢外，仲講吓點睇自己成為香港性感代言人，同將來嘅發展路向。