西班牙啱啱首次贏咗世界盃，球員應該對將來充滿希望，食住個勢喺2012年蟬聯歐洲國家盃；但有消息就話效力巴塞隆拿嘅後衞佩奧爾（圖）已經唔諗住再踢國家隊。雖然係咁，佩奧爾下個月11號仍然會代表西班牙，踢對墨西哥嘅友賽，之後先再同國家隊高層同教練迪保斯基傾去留問題。其實佩奧爾今年先得32歲，仲叫做當打，踢埋2012年歐洲國家盃都只係34歲，絕對可以喺兩年之後先再打算係咪退役，而家咁快話唔踢，定係其實有其他原因？