書展下星期三又嚟喇，好期待偶像倪匡「新書」《倪匡．未成書》（$70），編者黃仲鳴話，倪匡回流初時提到自己1957年由大陸偷渡嚟香港，投過稿畀當時《工商日報》萬言小說專欄，係佢首篇刊登作品。有女記者事後去港大圖書館搵當年《工商》逐日睇，首先搵到一篇《活埋》，黃仲鳴之後班馬加大搜索範圍，喺舊報紙堆總共搵到七篇結集成書：「呢啲都係倪匡未曾出過書嘅作品。」
佢話批文章大多係帶反共意識嘅小說，如《活埋》係講內地土改情況，同親台灣嘅《工商》一拍即合。其他作品有一篇關於香港社會狀況，又有改寫聊齋嘅古仔，但就未有科幻題材。
港督聲音收錄成書
倪匡喺序講，當年做咕喱雜工，日薪得$3.5，投稿稿費有成$90，從此全職寫稿。倪匡當年20歲出頭，佢話已經記唔起呢啲初期作品喎。社長彭志銘話今年冇出政治諷刺漫畫：「連鬧曾蔭權嘅書都冇人想買。」
商務都有好多新書，有本好有趣，就係《最後六任港督的聲音》（$78），係市面唯一收錄昔日港督演說錄音嘅書，反映回歸前香港社會情況，好多議員高官都要學吓。
三聯舊年書展推出嘅《香港彈起》賣個滿堂紅，今年再由作者劉斯傑嘅《中國彈起》出戰（中文版$330，英文版$350）。六個紙雕包括長城、兵馬俑、故宮同鳥巢等，一打開本書就彈起，吸引力唔低。
電郵：mailto:[email protected]