日本人所講的暴走總被視為車一族。不過來到香港，暴走似乎與潮人畫上等號，就如眼前講求舒適得體的皇冠，明明係老細車，都要玩暴走，加上包圍、換上耀眼胎及尾翼，突然發現穩重老細都可潮得起，你覺得格格不合嗎？偏偏有人認為係佢杯茶。
記者：趙慧敏
攝影：伍慶泉
Model：Alia@PureModels
鳴謝：日本仁（香港）有限公司
（http://www.jpy.com.hk）
的士變暴走格
皇冠Crown成為的士的不二之選，首要原因是令乘客坐得舒適，但香港人買房車很少看上它，相信是覺得坐皇冠如坐的士，如你也如此一般見識就走寶了！這架3.0RoyalSaloon擺在眼前，眼力差啲都認不出真身，RoyalSaloon屬07年出廠貨，車主將原裝正版改頭換面，營造截然不同的暴走味。
頭燈加橙貼
一套TRD包圍，泵把與頭唇的一體化設計，加上搶眼的霧燈、氣壩的格仔網紋，令整架車顯得低矮之餘，亦添加不少跑味。頭燈貼上反光橙色貼紙Eyeline，原來是近年日本潮流之選，晚上開着頭燈，特別耀目。
車側換鏡面
要玩暴走當然要高調，未打開車門，已發現兩側車門門邊都換上超閃鏡面，閃得來當鏡照都得。
尾翼營跑格
原本在尾箱位置已有原裝擾流器，但為要增添暴走味，車主特別添置頂置擾流器，雖然實際作用不大，但確實型了不少。
胎軨閃到爆
講到搶眼，19吋合金胎軨的16輻式設計，絕對閃到暈，配薄胎及鮮紅鮑魚（煞車卡鉗），還將原裝避震換埋，令整體車形更添惡相，務求睇得又劈得。
花形波棍夠姣
倒後鏡加上日本人氣DAD鏡套及毛毛吊飾，充滿東洋味。不過波棍一定是搶分之作，以金屬打造花形圖案，夠晒貴氣，但個人就覺得有點姣，揸起手感覺都零舍不同，不過近日天氣咁熱，揸起手難免有幾分「辣」手呢！
其實就算唔改，Crown3.0RoyalSaloon原裝版本亦不輸蝕，中控以黑色木紋配飾，有別於一般桃木款，加埋Keyless功能及後泊車顯示鏡頭等，都屬豪華級數；不過有時細微細眼反而最令人驚喜，熄車後自動收起軚盤設計，感覺夠Cyber！原本對這款車算不上有好感，看過後突然改觀，有時要變都是事在人為呢！
