日本動畫大師宮崎駿形容喺火車上玩iPad似自瀆。咁煲呔喺立法會用iPad，唔知似乜呢？日前喺答問大會首次帶部私伙iPad出嚟嘅煲呔，噚日喺網誌撰文，解釋佢用iPad唔係扮in。
佢話，去立法會之前佢都做足功課，各政策局全力襄助，提供嘅資料成本電話簿咁厚，但翻查時好論盡，改用iPad之後，用手按吓就一目了然，因此日後佢或者會同一叠叠文件講拜拜。
煲呔話無紙化係環保大勢，舊年11月高層早禱會已唔再影印剪報，改為掃描成PDF檔。呢份被稱為「早餐」嘅剪報囊括每日要聞、社評、專欄，厚百多頁，開會印幾十份，一年就用成百萬計嘅紙。煲呔仲計劃推廣無紙會議去政府其他領域喎。