香港家唔止導遊逼人購物出晒名，就連香港一直引以自豪嘅自由都開始被蠶食，國內同胞挑通眼眉。
內地知名博客冉雲飛似乎嚟咗香港，噚日喺牛博網發表篇題為〈自由香港就是如此這樣被蠶食〉嘅博文，話一直注意香港內地化嘅細節，切實感受到香港被蠶食嘅現實。
假遊客擅闖影相
佢話呢幾日同唔同嘅朋友食飯，大家都講一個真實故事，話一班人喺個偏僻地方開會，有個人嚟影相，仲要求與會者打開門俾佢影埋入面；問佢係乜水，對方居然話係內地遊客。咁呢個人梗係唔係遊客啦，應該係內地派嚟收料嘅。
綽號「冉匪」嘅冉雲飛指出，呢啲「沒有品質的撒謊」蔓延到香港，香港警察近來做法「讓人感到他們直接受教於內地公安」。例如，告人襲警變成佢哋對付示威者嘅撒手鐧。
冉匪又講到政改一役民主黨俾人鬧，原因之一係黑箱作業；如果日後官方唔守承諾，民主黨有乜方法彌補呢個「沒有制衡能力之妥協的後果」。
冉匪語重心長咁話，呢啲係佢「活了幾十年對官方的現實觀察」，對方「只認實力」。當你冇真正實力時，如果信佢哋會遵守你同佢妥協嘅方案，就恐怕係過於樂觀嘅天真，因為翻手為雲，覆手為雨，係官方嘅強項。