最近幾隻急跌股票輸到散戶飛起，霸王集團（1338）在毫無先兆之下被指產品疑含有致癌物，當日即時勁跌，復牌解釋一輪之後仍未令股價止瀉。這間公司過往幾年突然冒起，全靠打廣告打品牌，請到天王天后級明星做代言人，廣告費用不菲，假如產品安全性出現問題，日後打幾多廣告都無用，因此即使短期股價跌得過份，仍不宜輕率撈底。
另一隻急跌股係紫金礦業（2899），受到污染河水新聞所累，股價即日勁跌12%，反彈一日之後又再跌過，昨收4.82元，跌3.4%。睇番圖表，紫金自去年11月以來股價暴跌近5成，走勢一浪低於一浪仿似無底深潭，一單新聞都可以令股價急跌，證明弱勢股好難翻身。
受旗下銅礦污染汀江事件影響，紫金被當局勒令要停工及向受影響居民賠償，估計損失高達4億元人民幣。公司管理層表示，銅礦所在的福建上杭縣政府，已對水庫內受污染的死魚，按每斤6元進行回收，而魚苗則每斤12元回收，有關款項會由縣政府先行墊支，待核實賠償金額後，再由紫金承擔。
污染事件損失難估計
另銅礦被迫停工，一旦下半年仍無法復產，該公司在今年銅總產量將下降6500噸，損失3.69億元，連同賠償受影響漁戶將損失近4億元。紫金H股近3個交易日市值減少30億元，理論上遠高於以上銅礦損失，但係假如咁易計數，英國石油唔會蒸發數以千億計市值。最大變數，係紫金唔知仲有多少環境保護問題未解決，日後各地政府一旦全部「執正」環保條例，公司的經營成本唔知點計。
事實上，股票價值還有一個投資者給予的溢價與折讓無得去計，管理層的訊息披露有時也會影響股票所謂的「溢價」。
歐陽風