英式足球喺美國唔算係主流運動，不過當路雲喺禮拜三舉行嘅ESPY頒獎典禮上就搶晒鏡，同分緊居嘅明星太太比安卡齊齊出席之外，仲一個人擸咗3個大獎，搞到分別當選男、女子最佳運動員嘅美式足球員比斯同埋滑雪好手禾恩，都要企埋一邊。
鋒芒蓋美式足球員
ESPY頒獎典禮好比奧斯卡，係美國體壇嘅盛事，每年會頒獎畀有出眾表現嘅隊伍同埋運動員，以表揚佢哋喺所屬項目嘅貢獻同埋成就。一如所料，帶領新奧爾良聖徒捧走今屆超級碗嘅四分衞比斯，同埋喺溫哥華冬奧攞咗1金1銅嘅禾恩，分別成為男、女子最佳運動員。
除咗最佳運動員，比斯仲贏咗3個獎，包括最佳表現、NFL最佳球員，以及同隊友一齊攞嘅最佳隊伍（新奧爾良聖徒），頭尾贏咗4個獎，成為大贏家。
不過，美式足球係美國4大運動之一，所以比斯四喜臨門，大家一早預咗；反而玩英式足球嘅當路雲大演帽子戲法，就令人有啲意外。喺今夏南非世界盃決賽周，當路雲喺最後一場分組賽嘅補時階段入波，令美國戲劇性地以1:0贏阿爾及利亞，兼以較佳得失球壓倒同組嘅英格蘭，以首名打入16強，故他亦贏得「壓力下最佳表現」同埋「最精采時刻」兩個獎，加埋攞咗MLS最佳球員，總共擸咗3個獎。而喺領取「最精采時刻」獎項時，佢仲同埋班隊友包括保卡尼加等一同上台，盡顯美國嘅團結精神。
或與分居妻子復合
當路雲喺已分居嘅太太比安卡陪同下出席頒獎典禮，於是有傳佢哋醞釀緊復合，如果係真嘅話，呢位效力洛杉磯銀河嘅球員，真係事業愛情兩得意。
另外，喺溫網賽同馬亨打咗11個鐘頭零5分鐘，創下網球史上最長比賽時間嘅伊斯拿，就攞咗「最破紀錄表現」大獎。