幾個中資電訊股舵手之中，老大哥中國移動（941）董事長王建宙一直都最開明、有大將之風，估唔到臨近「咬糧」，宙仔為咗反腐倡廉，整番鋪省級高層大洗牌，要將間公司執得企企理理，真係夠晒承擔！
查實呢次係宙仔喺任內嘅第二次大換崗，但唔同2005年佢初到埗嗰次，呢次基本上99%係受壓而做嘅，何解？由舊年底阿春（張春江）受查，今年頭黨組成員施萬中喺深圳俾中紀委啲人踩場帶走，再到4月四川移動數據部總經理李向東，挾咗幾億元走佬而佢老頂李華就遭雙規，單單都唔嘢少，試問宙仔又豈能無動於衷呢？所以，先喺今個月9號，召開咗反腐倡廉大會，之後就郁手，例如原江西移動總經理，就調咗去四川返工。
輪崗或難制訂長期規劃
宙仔有決心就唔使講，但大換崗work唔work？有口痕友話，歷代皇帝為咗鞏固自己嘅權力，防止官員結黨營私，都鍾意實行輪崗制度，但效果往往相反，因為權力同時間緊迫，官員會變本加厲斂財兼夾濫權，而放番喺中移動身上，管理層喺一個崗位時間短，反而好難制訂長期規劃。
針無兩頭利，肯試，點都好過乜都未做就話唔得，所以，華華仍然要俾宙仔一個讚字！
李華華
mailto:[email protected]