睇嚟大部份英格蘭國家隊球員，已經將上個月世界盃16強止步嘅傷痛忘記，個個都走去度假。繼朗尼同艾殊利高爾之後，29歲前鋒高治就同佢24歲模特兒未婚妻艾比去咗意大利嘅薩丁島，仲好似玩得好開心㖭！
高治同佢未婚妻兩個不知幾咁癡纏，除咗喺水入面攬到實一實之外，仲俾人拍到身穿比堅尼嘅艾比一度玩「人叠人」，瞓咗喺高治身上面曬太陽，完全旁若無人。之後艾比亦好體貼咁為高治搽防曬，表現恩愛。曬完太陽後，佢哋坐艇出海，高治仲即場表演跳水，雖然姿勢分一般，但睇得出佢心情大靚。據聞，佢哋原本打算喺今個夏天結婚，但係因為南非世界盃而押後婚期，艾比仲話已經開始搵最完美嘅婚紗，應該好快就拉埋天窗，不過佢哋話無諗住生仔。