周初內險股成為升市中嘅異類，中國人壽（2628）更連日跌到四腳朝天，事關中保監宣佈開放傳統人壽保險2.5厘嘅預定利率（保證回報）上限，可能影響從事壽險業務嘅中國太保（2601）同國壽盈利。市場擔心中保監將開放壽險傳統產品，未來分紅險及萬能險利率亦進一步開放。雖然保險公司可乘機搶灘嘅空間有限，但情況有如銀行息差收窄，壽險股資金已急不及待聞風先遁。
呢盤生意絕對係肥肉，根本就係用保單持有人嘅錢入市等運到，關鍵係點樣可以吸引客戶幫襯你，一係睇你牌頭；二係睇你畀到幾多着數。市場一旦開放，競爭大咗，經營成本自然上升，利潤受壓，直接影響一直享受寡頭壟斷優勢的國企龍頭，國壽、平安保險（2318）同太保份屬國家隊選手，預期未來隨時發生同室操戈局面。
停牌多日嘅平保避過一劫，但查實佢受上述政策影響程度最細。按估值出發，國壽今年市盈率21倍、市賬率3.5倍、市價相對內含值2.6倍、股東資金回報17%，上半年未經審核原保費收入1930億元（人民幣．下同），按年增加11.75%。
國壽股東不妨換馬
太保則公佈，上半年壽險累計保費收入按年增長48.8%至523億元，今年市盈率26倍、市賬率2.6倍、市價相對內含值2.3倍、股東資金回報11%，預期市盈率將隨盈利增長改善，股東資金回報亦隨保費收入勁增而進一步提升。
雖然太保市值只係國壽三分一，兩者有如龜兔賽跑，但隨着市場開放，難保國壽快步跑嘅日子已過去，仲未計多少為人民服務嘅政治任務性質投資，就好似今次農業銀行（1288）咁，結果硬食兼可能坐艇。
中國人儲蓄率高，保險業發展商機龐大，雖然長期睇好，但係當兩隻同板塊個股走勢出現奇異背馳，仍對國壽不離不棄嘅癡心戰友，係時候要考慮吓移燈換凳轉轉運。
胡孟青
獨立股評人