商場變成動物園，擺咗一大堆蛇龜出嚟展覽，都幾得人驚。新地旗下大埔超級城同元朗廣場，下個月展出一條身價30萬元嘅薰衣草白化球蟒蛇。呢條蛇係全港最貴球蟒，特徵係頭細身粗，對眼呈現金色，好詭異，而另一條白化球蟒，身上仲有淺紫色，更加罕有，所以特別矜貴。
至於身價15萬元嘅超級直線球蟒，係香港首次公開展出，難得一見。今次展出嘅球蟒，全部都係人工繁殖，展覽同時有蛇蛋睇，如果好彩，可能見到蛇仔破殼而出嘅一刻。展覽除咗有球蟒睇，仲有全世界最大嘅陸龜亞達伯拉象龜，價值高達100萬港元，有咁多身家買龜，屋企都要有番咁上下大先養得到佢。