一年一度書展唔只係o靚模嘅世界，唔少政界中人都趁機出書。
因為支持政改方案而頻頻捱轟嘅民主黨何俊仁亦不讓o靚模專美，今年獻出第一次，寫咗一本名為《謙卑的奮鬥》嘅書，內容主要講述佢過去近30年從政血淚史，當年如何在新界西落選，東山再起後殺出中環，仁哥坦言冇乜料爆，加上本年1月已經埋稿，所以並無觸及同北京談判政改過程；假如新書銷情理想，不排除再版時加料。
名人出書，通常會搵名人寫序，仁哥話自己怕麻煩朋友，所以一切從簡，自己操刀寫篇前言就算。佢又話好希望80後會睇呢本書，唔係屈機賣書，而係想80後嘗試了解吓佢呢代社運人嘅奮鬥模式，當年在殖民地、主權移交歷史時刻如何自處。
書展期間辦座談會
仁哥會在書展期間舉行新書座談會，不過就唔會搞簽名，佢笑笑口話萬一有80後踩場燒書咪弊！《謙卑的奮鬥》盛惠120蚊，相信可以減低80後買嚟燒嘅機會。