陳志雲的涉貪事件激嬲無綫最高揸弗人六嬸方逸華，他停職期間，又一度欲走位到商台開咪主持新節目，可是卻遭無綫禁止，就連昨日原本有份為失明人士下月舉行的聲演會做宣傳，陳志雲前日也趕急以私人理由，通知大會辭演，看來無綫全面封殺陳志雲，復工遙遙無期。
陳志雲早前涉嫌貪污遭廉署拘捕，該案仍在調查階段，他事發後即被無綫停職，這段期間，陳志雲卻高調為自己安排工作，上周四還現身宣傳為商台主持的新節目《生死之交．陳志雲》，但本周一商台卻通知傳媒陳志雲的節目要延期推出。
兩星期前仲有開會
陳志雲原定昨日與黃耀明、at17和失明人士莊陳有在美孚出席《暗中作樂》聲演會，該演出將於下月7、8日在太古坊ArtisTree中以全黑暗環境舉行，據知陳志雲本答允屆時唱歌，可是商台開咪撻Q，下月的聲演會也同樣命運，有指是無綫最高揸弗人六嬸方逸華下旨要全面封殺陳志雲。
莊陳有直認最初主動邀請陳志雲演出，他即爽快答應，但昨日卻突然請辭，莊陳有說：「佢噚日通知我哋話今日嚟唔到，下月兩場表演都做唔到，佢係以個人理由辭演，係乜嘢原因就要問番佢。」莊陳有指會邀請陳志雲當晚來捧場，但拒絕評論陳志雲的辭演是否受無綫封殺有關。
同場的黃耀明卻爆料指陳志雲早前仍有為演出開會，他說：「陳生兩星期前仲嚟開過會，佢畀咗好多意見，佢係《暗中作樂》嘅義工，佢好落力。」
公司回覆唔適合做
陳志雲遭無綫封殺，復出無望，無綫外事部副總監曾醒明昨日在電話訪問回應：「陳生始終係TVB員工，佢要接公司以外嘅工作，就一定要向公司申報，佢有問過公司嘅，應該係公司一併回覆佢唔適合。」
採訪：胡比、林妃
攝影：黃文偉
