天下男人皆鹹濕。尤其正值青春期，面對肉體橫陳怎不心癢？再望望戴住小雲眼鏡的女同學，落差太大，惟有投入鹹片鹹書的世界。80後港男個個喝AV的奶水大：「川島和津實話係為咗供男友讀大學先下海喎。」「嗰陣都真係幾信。」「半推半就楚楚可憐咁先似層層……」霎時間，青春歲月返晒嚟。
記者：蔡慧敏
攝影：陳盛臣（大相）、周旭文
Laurent
坦蕩蕩，從事傳媒工作，長期散工，過着不羈的生活。
阿峰
小學時曾是鹹書同學會的發起人，長大後投身教育界，故不便出鏡。
Ocean
看鹹片之餘亦製作網上短片，反政改反高鐵。因事忙未能參與拍攝。
聯校男生團購鹹書
說起「鹹濕初體驗」，在未有互聯網的年代，不外乎都是「在衣櫃發現了阿爸的VHS」、「在同學屋企發現」甚至「從街上偶拾得來」。Source難求，自然要發揮群眾力量，所以在小學和初中階段，睇鹹書/鹹片是半地下行為，友儕間夾錢買鹹書、睇鹹片很是普遍。Laurent話：「上同學屋企睇片似朝聖，唔係個個都有錄影機o架。不過重點是要炫耀自己有幾曳！其實大家都唔識（性），又無錢。」官能刺激最易膩，要時刻保鮮，惟有不斷更新貨源。阿峰翻箱倒櫳找來小五小六時的「毛毛語錄」，更是笑爆嘴。原來「毛毛黨」是他當年發起的鹹書團購組織，每個月交$10會費，便有新鮮出爐的鹹書睇：「全盛時期有廿幾人，連隔籬學校都玩埋一份。」還勁到有黨歌、黨規、會員名冊和數簿。鹹書藏在類似「二十世紀少年」基地，「最經典一次是攤在鹹書堆上睇到瞓着咗，阿媽回來撞破，我仲話：『家考完試，點解唔可以睇?!』」
棄老翻AV轉上網單撈
90年代初港產三級片大盛，但當時年紀尚幼的80後好快就跳過了「孖葉」年代，捲入日本翻版AV狂潮。Laurent話：「一定係睇日本AV，有水準又最親切。」麻甩仔與鬼妹有距離，又嫌本地薑唔夠激：「睇鹹片都是為了㷫烚烚，但港產三級片太raw，成日影住女主角個樣，無嘢睇，過程又短，又要扮有劇情，好煩。」而且老翻AV太易買到，各區的商場仔內總有一間喺左近，「到中三中四時已好少一齊睇，有奇碟先會一齊分享。」有幾奇？「有隻叫《奇怪的B》，成套不停closeup口交，上bio堂一樣，睇到嘔。」不過來得快去得快，踏入2000年後互聯網大盛，鹹碟已差不多完成其歷史使命。星際的四仔由100蚊5隻賣到100蚊13隻，上moodyz網download好過！現時還會幫襯的只得不上網的阿叔。雖則男人由13到80歲都鹹濕，但相比起小時候的「求鹹若渴」，三人都表示已收斂不少：「家要做嘢，邊有咁好精力啊！」
自評川島係女神
人人都講到自己睇片無數，但要回想那些女優的名字，竟甚是困難。除了三人分別都想起川島和津實，其他零星落索的就只有小沢圓，和現時仍未消失的吉沢明步和蒼井空。川島和津實是98年尾到99年中紅極一時的AV女優，只拍過六部片便嫁予經理人，收山去也。用家評語又如何？Ocean：「她主導了往後AV女優的風格！一臉不願又繼續搞。小沢圓和蒼井空就太多『表情』了。」阿峰：「唔係真係好靚，但清純。那時真係信佢為咗幫男友交學費先拍AVo架。」Laurent：「有肉地，大胸，可憐。令人想征服！」
文化人：AV女優收費賤
現時的細路或六七十後未必識得川島，因為AV女優的事業周期僅一兩年，紅了便瘋狂拍，拍到睇厭為止。中大日本文化研究學系講師健吾說，日本人看待AV的態度其實並不認真：「看過台灣一個宅男節目，他們講得出好多AV女優的名字，但一般日本人其實都不甚了了。」由於網上鹹片盛行，日本AV界無可避免受到影響，DVD越來越平，女優人工也少得可憐。戴套的一場戲（每部AV約有4-5場）僅1-2萬日圓，唔戴套都只得6-7萬日圓。「弔詭的是AV產量並無明顯下跌，繼續狂拍務求有一部跑出。」
蕭公子搞三層樓巨胸
91年的《玉蒲團之偷情寶鑑》勁收1,800萬，葉子楣、徐錦江這些經典卡士已成集體回憶。而講了兩年的《3D玉蒲團》終在8月開拍，預計明年5月上映，實行引誘自由行南下睇禁片。監製蕭若元和蕭定一父子雙劍合璧，說港產三級片死了十幾年，是時候來個立體回歸：「IMAX銀幕有五層樓高，即是有三層樓的巨胸，成個飛出來，只有入戲院先睇到。」四位女主角有兩個是現役日本AV女優、香港和內地代表各一，「總要有些純情、有些大胸，又有本地的才有投入感。」製作費預計是300萬美元。
無論老翻四仔或網上AV，80後都鮮有機會在大銀幕睇鹹片。中古鹹片3D化，對80後有無吸引力？Ocean先來一盆冷水：「鹹片的吸引不在於拍攝技術，而在於青春少女，除非搵o靚模拍啦！但香港太保守，對身體的態度好奇怪，覺得露點好出奇。」阿峰和Laurent就表示「會去見識吓」，兒時集體看鹹片屬小圈子所為，幾百人在戲院一齊睇應該相當壯觀！「但又驚有生理反應會好辛苦。」
80後之三級女神
