專職抽秤政府同公營部門大花筒嘅審計署一向不受同僚歡迎，署長鄧國斌早前接受《南華早報》訪問，話審計署未開快勞查私隱專員公署盤數前，冇聽過私隱專員吳斌個大名，完成審計後，吳斌就即刻捲起衫袖做嘢，積極維護市民私隱，暗示本月底退休嘅吳斌「hea」做呢份工。
吳斌出律師信促道歉
俾鄧國斌咁窒法，年屆68歲嘅吳斌都扯火嬲到震，噚日喺記者會上指摘鄧國斌誹謗，上星期四出律師信要求鄧國斌道歉同賠償，如果獲得賠償會捐予慈善機構。吳斌今次動真氣，除咗認為鄧國斌出言侮辱，亦抹煞公署員工近年工作努力，所以要代表下屬討回公道。
對於被批評偷懶，吳斌話在任五年，公署主動進行11項調查，而佢上任前，公署只係做咗一份調查報告啫。而最令吳斌反感嘅，係鄧國斌質疑佢以半退休心態做呢份工，佢噚日嚴厲批評咁講法係歧視長者，「係咪60歲以後有新工作就會被指以半退休心態，飲住紅酒食住雪茄去工作？列根73歲做第二任總統，鄧小平83歲先至退落嚟，長者亦應該有尊嚴」。佢要求鄧公開向全港長者道歉，又揚言考慮向平機會投訴。
為證明自己唔係hea做，吳斌話自己經常親自帶隊去做嘢，直接見官員及機構，「我從來唔會匿埋喺辦公室度派人出去做嘢，所以被指半退休心態感到莫名其妙」。佢更明寸鄧國斌：「反而鄧國斌做咗審計署長以嚟，就從來未到過私隱專員公署辦公室，我唔知呢啲係咪半退休心態。」
吳斌以魚生形容同鄧國斌關係，即係「唔熟」，冇私交亦冇私怨，唔明白點解鄧國斌經常公開針對佢同私隱署，仲唔畀機會佢申辯，質疑做法有違公平、公義，咁做嚴重破壞審計署形象，鄧國斌應該閉門思過。
鄧國斌交律政司處理
鄧國斌收到吳斌封信，轉交律政司處理，吳斌指對方想以公帑解決事件，對納稅人不公平，佢費事俾人話嘥公家錢，決定原諒對方而且不再追究。至於事件另一主角鄧國斌則透過秘書表示，事件已交畀律政司處理，不作評論。
mailto:[email protected]