老牌工業股鴻興印刷（450）前年炒燶金融衍生工具，搞到要引入外人——私募基金CVC做大股東，姓任嘅真係連面子都輸埋，但捱咗兩年，終於捱到姓任嘅揸番fit喇！鴻興噚日宣佈，集團董事總經理任澤明，將會喺今年9月1日起轉任董事局主席一職，接替同CVC關係密切、並將同樣喺9月1日離職嘅原主席PeterMartinSpringford。
而由於真正嘅鴻興仔任生做番鴻興話事人，集團仲升埋原本做營運總監嘅DavidRoyEitemiller坐正做CEO，睇嚟呢位仁兄應該係任生馬房嘅人。
笑到見牙唔見眼
咁任生心情點？噚日業績記者會佢無同大家分享，但據華華觀察所得，佢真係由個心度笑出嚟，答乜嘢問題都笑到見牙唔見眼。鬼咩，佢伯爺任昌洪1950年用一部租番嚟嘅印刷機同埋一個夥計起家，搞出一個印刷王國，今年正值一個甲子，佢坐番正做話事人攞番家族個字頭，對得住列祖列宗，真係發夢都笑醒喇！
話時話，喺之前記者會都有出嚟幫手解畫、近年由「紅籌之父」變咗做「細價股保母」嘅CVC旗下CVCAsiaPacific高級顧問梁伯韜，噚日就無再蒲頭，唔知係咪同任生歸位有關？又或者係入咗股CVC兩年，賺夠想撇？
講開番薯梁，之前俾CVC認購咗總值21億元可換股票據嘅新鴻基公司（086）噚日宣佈，委任佢同埋佢partner何志傑做非執行董事……點都好過做代客泊車同廠佬喇！
李華華
mailto:[email protected]