Wi-Fi手提DV　隔空播高清

網絡家居聽唔少！例如將手機變成全屋遙控器，播CD、睇BD，甚至洗衫都得，可惜香港尚未流行！但Samsung就率先公佈可隔空播片嘅手提DV，用Wi-Fi技術，只須接駁全屋網絡電器，無論係LCDTV或Notebook都好，想Share即時串播，三兩下Step搞掂！

記者：陳國輝
攝影：譚盈傑
Model：Bambi@Jacso

聯播高清間中窒格

有時拍完片想立即睇效果，用Wi-Fi掟落其他Device就啱晒！S系列特別喺3.5"觸屏上，加咗Wi-Fi圖示，一指Click入去，就會進入無線傳輸介面，例如你可揀選指定影像檔案，Share到另一部DV之上；甚或以串流方式，即時喺有Wi-Fi配置的電視機上播放。現場筆者試過將一段約20秒影片，直接「飛」落LCDTV上播映（PlaytoTV），唔使5秒就有畫面睇，勁快手！
最抵讚係，佢連全高清影片都一樣照過，畫面仲Keep住咁細緻；但要留意，可能受Wi-Fi頻寬所限，測試時發現有窒格情況，約停頓兩、三秒，片段又會繼續播放；如果唔想睇到窒窒吓咁無癮，不妨你先用較低嘅解像度嚟攝錄，或者將文件Send去有HDD嘅裝置上亦得。

■掟上LCDTV，高清畫面完全無跌Watt。

■電視支援DLAN，就玩到隔空傳片。

■除咗Share，亦可選擇Backup落電腦。

配SSD減磅增容量

另一賣點係S系列全部採用SSD硬碟，例如S15配32GB，S16配64GB，好處係機身細，重量輕，而且仲提供防震功能，拎去旅行最適合不過！
容量都係驚唔夠？機身配置有SD/SDHC插位，以備不時之需；屏幕方面，S系列配備3.5"TouchScreen，揀相操作雖然方便，但大芒也引致耗電量大嘅問題，每次只能連續拍120分鐘，唔夠喉囉！