Rock妹李卓庭（Eunix）一見六代GolfGTI，已喪讚話好車，正想與她談DSG波箱有幾勁，她爆一句：「我最Buy紅色車！」一頭紅髮已夠爆，再加上Rock爆形象，誓要向大家說：「我要紅爆！」可是當處於三十幾度烈日當空，相信她不想紅爆，因為已熱爆！
記者：徐影龍
攝影：林栢鈞
服裝提供：H&M
冷氣重要過冷酷
遇着靚女抱住隻狗，十個麻甩佬有九個會伸隻手埋去摸摸小狗扮熟絡，「小心呀！佢叫賴皮，最憎人掂個頭，咬過我唔少朋友！」摩天使我養過，係外表可愛性格惡死嘅狗界表表者，呢點同今日兩位主角－Eunix及GolfGTI都有點雷同。
看到Eunix一頭野性紅髮，形象走中性Rock女路線，聽過近日派台歌《美麗二線》及《噴火女》，全以狂野快歌主打，以為她粗豪過我呢條麻甩佬，但見她頻頻照顧愛犬飲水嘆冷氣，影張相寧願自己曬都要留小狗在車內，就知她內心溫柔！就如火紅Golf一樣，外表剛陽味重，內裏又充滿溫柔體貼，「我一向勁Buy紅色車，GTI個樣火氣十足，四條專用梅花軨又超型，四門五座位，有時同賴皮出街遊車河，又或載埋朋友同屋企人都好方便，最重要係冷氣夠勁，大熱天時幾個人焗喺車廂，冷氣弱啲都唔掂。」
睇位易 啱女仔
福士最新款GolfGTI，來到第六代當然不只得個樣，一副2.0LTurbo偈，簡簡單單就過200匹，且配備雙離合器DSG波箱，轉波順暢兼快速，就算女孩子一樣可如大男人般飆得起，「我覺得GolfGTI幾啱女仔揸，細細架睇位易，所有按掣都好近身好就手，扭力又足夠，行起上嚟好爽，唔似拉牛上樹。剛才Sales哥哥揸嗰轉，令我感受到咩叫推背囉，我揸嘅話一個D波已足夠，應該唔使點用+/-波。」原來Eunix有好多朋友都揸這類揭背細車仔，「相比下GolfGTI個內櫳好舒服，車入面嘅梳化好軟熟，連最常用嘅天窗、6碟CD機、泊車鏡頭都有齊，最緊要有GPS，事關我真係唔多熟路呢！」
VolkswagenGolfGTI
引擎：1,984cc直四＋Turbo
馬力：210bhp/5,300-6,200rpm
扭力：280Nm/1,700-5,200rpm
傳動：六速DSG+/-波箱 頭驅
售價：$318,000
查詢：VolkswagenHK（36989688）
