好鍾意旅行，朋友都笑我冇身份證，只有落地簽證，所以每90日度要離開香港一次。不過有研究話，人喺10萬呎雲霄，味覺會暫時喪失20%至30%，所以飛機餐會調濃啲味。咁坐飛機咪會食多咗鹽或味精?
部份經濟艙都食到
「梗唔係啦，可以用香草嘛」利苑副總廚黃永寶話，最近啱啱同港龍首次合作推出飛機餐，菜式確實需要比較濃味香口，但唔會落多啲鹽，而係用天然香草，一樣帶出濃味，但唔會食到口乾。
作為米芝蓮一星級食府大廚，寶哥嘅菜單當然唔係一般飛機餐，而係有醬燒銀鱈魚、宮廷醬烤骨等，當然唔少得招牌醬料XO醬炮製嘅野菌爆蝦球、蘆筍野菌炒帶子，共有近30款。寶哥噚日下廚獻技，食到差啲儀態都冇埋，偷偷食埋人哋嚿蝦。
港龍嘅Grace話因為25周年所以搞新意思，而飛機餐菜式都有要求，包括少骨、少湯、少汁，食起嚟唔麻煩，遇到氣流都唔會搞到周圍都係。寶哥話用料都會小心，如用蝦球唔要有蝦殼嘅。佢又話菜式急凍後，到機艙要再翻熱，所以煮嘅時候要啱啱熟，如果太生啲肉好易霉，太熟就翻熱時會太老。
星級餐喺前往台北、高雄嘅頭等同商務艙供應，但喺前往北京、上海嘅航班，連經濟艙都有，Grace話因為北京、上海客量夠多，尤其上海因為世博5至8月訂票量多咗40%，9月都多15%。餐牌上會寫明邊道菜嚟自利苑，下次記住睇清楚呀。
電郵：mailto:[email protected]