成班候選港姐噚日去咗培正中學，同香港沙灘排球隊切磋，佢哋大部份都唔係好識打，只有五呎九吋高妹10號馬鈞怡真係識打，仲識得高點扣殺，又被排球隊導師鄭景亮話佢似中國女排閃電美人劉亞男，最後佢仲拎埋突出表現佳麗獎。
死撐唔知規矩
鄭教練強調排球最重要係合作性，馬鈞怡係技勝一籌，不過佢得獎係因為佢識得遷就其他唔識打嘅女仔，同埋跟同隊女仔分工合作，仲讚佢有呢個好好嘅體育精神。
同場仲有一位佳麗表現突出，由於佢好搶鏡，仲被冠以「湯認真」之名，12號湯寶珍話：「係呀！我好認真。」問佢如果叫佢真姐好唔好？佢答：「好！都係唔好叫我阿姐，叫我認真，湯認真！」湯寶珍表示自己唔係好識打，但喺現場見佢飛身攝位搶波博到盡，明明個波唔係佢，佢又衝埋去接，雖然表現認真，但係都唔可以搶人個波打，仲話：「係呀，我好鍾意打，不過規矩唔識！」
不過，湯寶珍唔識規矩唔代表可以搶人個波喎，咁做分明博搶鏡喇！之後佢就用一個好專業嘅語氣解畫：「我唔係搶波，我係補位，我係打得好過佢哋，咪幫吓手囉！」
之後又講到消息話爆湯寶珍之前種種出位搶鏡招數，湯寶珍照例全部唔認，仲話：「我唔想突出，大家女仔一齊開心就夠！」