「最低工資條例草案」通過在即，作為臨時最低工資委員會委員嘅大家樂（341）主席陳裕光，本着自己同小股東利益嘅商業考慮出發，公開表示若最低工資定於33元就要發盈警，此言一出，登時被封為「陳十九」。
從股東利益出發無可厚非，可惜喺貧富懸殊、仇富心態極強嘅香港地，商家佬市儈形象水洗唔清，可能陳生接手呢盤生意以來都係一帆風順，以一間連續24年有息派、股息連續12年有增長、派息比率高達68%、毛利率上升至17%、成功加價減每碟食品份量，仲要明年迎接上市25周年嘅企業，係值得同業學習嘅樣辦。但係當好食好住太耐，不識民間疾苦，就容易同基層脫節，甚至顯得不近人情。
用數據服人更有力
崇尚自由市場經濟嘅新人類，認為今次即使立法都只係好心做壞事，上有政策下有對策，無良老闆會考慮炒人。呢個世界係講協商同妥協嘅，開天索價落地還錢，喺19蚊同33蚊之間，可唔可以中間落墨？不過我相信佢冇吉士喺25周年發盈警，業績報告口口聲聲話「縱然未能與業主就租金下調取得重大成果，我們透過提升員工生產力，全面深化營運效益。」睇嚟，影響公司業績最大因素並非工資而係租金。
假如我係陳先生，就會用具有說服力嘅數據，將現時人工成本同心目中最壞情況嘅假設（即係33蚊時薪），拉一條數做晒ScenarioAnalysis（情境模擬分析）畀大家參考，總好過毫無理據支持嘅一句足以令人無限放大嘅言論。陳生嘅言論觸發太子道分店被踢館搞到要落閘，令人擔心該店嘅生意損失，能否抵償燈油火蠟人工同租金開支。
勞資雙方永遠站在利益對立嘅兩個極端，雖然資方欺壓剝削勞方嘅事例多不勝數，我唔會扮嘢企上道德高地話資方可恥，市場講供求，社會要追求嘅係妥協加平衡。
胡孟青
獨立股評人