唔好以為世界盃過後，就唔使捱夜，今個星期好多Game迷照舊要通頂，講嘅係新返PS3名作《白騎士物語~光與闇之覺醒》，好多人自已煲Game之外，仲要上網同人組隊團鬥，睇完波、仍然未能擺脫夜生活，一日有無28個鐘？
記者：許福合
8大新技能
好多白騎士Fans都覺得，玩過前作，一定喜歡這集新作，除咗畫面靚啲，聲效勁啲呢類例牌升呢外，今集真係有唔少新意加入。
玩戰鬥類遊戲自然離不開打鬥，而武器嘅種類當然越多越玩得過癮，今集控制嘅角色可以使用8種武器，除一般刀劍，仲有精靈魔法同神聖魔法，每種武器仲會有指定技能，用AC及MP就可以發動，戰鬥時完全可當作必殺技咁出招；咁厲害嘅招數要學習自然要付出代價，角色升級時會獲得SkillPoint，技能就係用點數換取，正所謂僧多粥少，技能點都係先煲爆一樣熟用嘅刀劍，然後再玩多方面發展先係王道！
ARCKnight變身
叫得白騎士系列，當然唔少得角色變身成騎士——ArcKnight，戰鬥力更高之餘，最好玩仲係可以讓玩家自訂裝備，可以在專用裝備房中，安裝或升級裝備；因應不同敵人，招數一般分為斬、刺及擊打形態，設定時可專門配搭合適裝置，玩法就變得更多元化。
例如遇到會飛嘅敵人，可先用弓或魔法將佢擊落，再上前埋身戰鬥；這個時候如見到敵人身上出現攻擊標誌，如斬擊、打擊、突刺，只要用指定攻擊手法，就有機會讓敵人陷入硬直狀態！這時就可以轉到怪物弱點位置攻擊，打怪Easy好多o架！
Online要連線碼
呢類RPG玩法一向都有既定模式，習慣咗自然無晒新鮮感！好多Fans都睇重《白》嘅Online模式，想同朋友組團打任務；不過今次廠方唔知係咪想趕絕二手，玩Online需要連線碼，傳聞仲話只能在一部PS3上使用。
除此之外，這個碼亦令到好多玩家頭痕非常；Online服務開啟後，好多人發覺玩唔到！事關要進入網戰，須使用日本PSN賬戶先連到線，你急急腳用香港戶口入Game？咁對唔住喇，你啲Level同武器要有重練嘅覺悟！
主機：PS3
遊戲類型：角色扮演
遊戲人數：1-6人
製作廠商：Level5