世界盃曲終人散，球迷睇完波，始終都係落場踢過癮啲，一年一度記協盃開始籌備工作，有波牛行家同八方講，記協今年修訂賽事規則，忽然提高參賽門檻，規定參加隊伍需要有至少過半數球員係記協會員。
無非想吸人入會
該行家同八方講，鍾意踢波或好波同事，未必係記協會員，而在愛國報章工作者，傳統上唔加入記協，個別暢銷大報嘅員工，習慣上亦唔入記協，因此呢條參賽新規則，好可能影響大家組隊參賽意欲，由於記協盃總算係行家參與多年嘅聯誼活動，如果因為咁而無緣落場，難免可惜。
據八方了解，記協修訂規則，無非係想吸引多啲人入會，事關記協盃性質說到底都係會員活動，每年記協都要投入大量人力物力舉辦賽事，如果成為變相「公開賽」，可能對其他會員難交代，因此修訂規則希望撥亂反正。有見行家意見甚多，據知記協已聯絡擬參賽行家搵時間坐低傾傾，總之萬事有商量，如果參賽隊伍唔反對，不排除賽例可彈性處理。