情報蒐集對執法者嚟講非常重要，如果冇針收唔到料，好多案件就未必破到。好似警隊咁，近排接連偵破多宗非法賭波案同黑社會案，都係靠情報同無間道食糊，強化刑事情報收集成為警隊重點策略之一。
新界南總區就肩負起推廣全警隊參與情報收集工作嘅重任，為咗建立警隊情報收集文化、鼓勵各級人員參與，豐富情報系統資料，以及推廣和試行最佳情報收集方法，呢個總區根據「3A方針」，即警覺、接受及行動，擬訂立連串推廣活動同工作坊，新界南總區「一哥」謝樹俊仲親自督師，向呢區總督察級或以上嘅中高層人員講解計劃，再由佢哋向前線人員講解詳情，希望人人有料到，個個去收風。